- Publika iha: 29 Março 2023
Diretór Edukasaun Munisipál Lauten, Rui Branco, dehan totál estudante na’in 875 iha munisípiu Lauten mak sai benefisiariu ba programa bolsa méritu ne’ebé oferese husi Ministériu Edukasaun Juventude no Desportu (MEJD).
Nia dehan, programa bolsa méritu ne’e MEJD kria hodi valoriza estudante sira-ne’ebé hetan mellór klasifikasaun iha tinan 2022 nian no liuhusi bolsa bele atu enkoraja nafatin estudante sira atu bele estuda di’ak liutan nune’e mós ba estudante sira seluk atu bele haka’as an estuda.
“Ita-nia estudante ne’ebé hetan mellór klasifikasaun hodi sai benefisiáriu ba programa bolsa méritu hamutuk na’in 875 ne’e kompostu husi ensinu-báziku to’o sekundáriu,” nia hatete.
Nia dehan, totál estudante hirak ne’e, iha estudante ne’e na’in 433 mak konfirmandu ona tanba dokumentu kompletu ona nune’e mós loke ona konta-bankária iha Banco Nacional de Comércio Timor-Leste (BNCTL) no falta estudante na’in 422 tanba sira seidauk loke konta-bankaria maibé lista iha ona MEJD.
“Iha estudante na’in 433 mak tama iha faze primeiru no ita-nia estudante ne’ebé mak tama iha pagamentu bolsa méritu etapa segundu iha na’in 422,” Diretór Branco informa.
Tanba ne’e nia dehan edukasaun munisípiu esforsu nafatin hodi informa ba família no inan-aman sira atu trata lalais sira-nia dokumentu hodi loke konta-bankaria atu nune’e estudante na’in 422 bele assesu ba sira-nia direitu.
Entretantu, Ministru MEJD, Armindo Maia dehan totál estudante ne’ebé sai benefisiaria ba programa bolsa méritu iha Timor laran hamutuk na’in 3,517 ho totál montante orsamentu millaun 7.2 dolares amerikanu.
“Pagamentu ne’e iha halo ba parte tolu hanesan, klasifikasaun nivel nasionál, rejionál, no munisipál nian, nune’e mós montante osan ne’ebé sira hetan mós la hanesan tanba tuir ida-idak nia klasifikasaun,” nia dehan.
Nia dehan, ba estudante sira-ne’ebé seidauk kompleta konta-bankaria tenke loke an atu nune’e bele asesu ba sira-nia direitu.