Ensinu Superiór Obrigatóriu Hanorin Ho Língua-Portugeza

Konsellu-Ministru aprova alterasaun ba lei baze edukasaun númeru 14/2008 dia 29 outobru no bazeia ba lei ne'e ensinu superiór publiku no privadu iha territóriu laran obrigatóriu hanorin no Língua-Portugeza.

Ministru Ministeriu Ensinu Superiór, Siénsia no Kultura (MESSK) Longuinhos dos Santos dehan, alterasaun ba lei ne'e hodi define Língua-Portugeza sai hanesan língua instrusaun iha ensinu superiór sira tanba durante utiliza maibé la ho sériu.

Nia dehan, durante ne'e Língua-Portugeza utiliza duni hodi hanorin iha ensinu superiór tuir lei baze edukasaun, maibé ida-ne'e la define tanba ne'e mak implementa la sériu.

"Liuhusi aprovasaun ba alterasun Lei Númeru 14/2008 ne'e obrigatóriu ensinu superiór hotu tenke utiliza Língua-Portugeza hodi hanorin iha sekola," Ministru Santos dehan.

Tanba ne'e nia dehan, bainhira implementa lei ne'e ensinu superiór hotu tantu públiku no privadu tenke utiliza Língua-Portugeza no ekipa sei kontrola.

"Iha lei ne'e define mós sansaun ba ensinu superiór sira-ne'ebé mak la implementa Língua-Portugeza ba iha prosesu aprendisajen," nia hatete.

Tanba ne'e nia dehan, alterasaun ida hodi refere ba língua instrusaun, ne’ebé define língua portugeza hodi utiliza ba sistema edukativu iha Timor-Leste no lian tetun sai hanesan papél fundamentál hodi apoiu de’it.

Entretantu Prezidente Komisaun G Trata Asuntu Edukasaun iha Parlamentu Nasional, Deputado Antonio Verdial dehan, durante ensinu superiór balun sei hanorin hela ho lian Indonézia no la utiliza Língua-Portugeza.

"Husu ba governu tenke halo uluk avaliasaun ba ensinu superiór sira-ne'ebé uza lian Indonézia tanba lian Indonézia la’ós lian ofisiál maibé nia hola parte iha lian merkaduria," nia hatete.

Maibé nia dehan, fiar katak ho implementasaun alterasaun lei baze edukasaun ne'e, nune'e Profesór no Dosente sira maioria hetan ona formasaun Língua-Portugeza bazeia ba lei ne'e sira bele hanorin ona iha eskola.

“Ha’u husu ba ensinu superiór bandu kedan ensinu superiór sira-ne’ebé hala’o aprendisajen ho lian Indonézia, no tenke hanorin ho Portugés," nia husu.

Tanba ne'e nia dehan, hanorin ho lian seluk hanesan Indonézia ne'e di’ak maibé aban bain rua fó impaktu ba estudante sira bainhira remata estudu.