- Publika iha: 12 Setembro 2023
Ministra Edukasaun (ME), Dulce de Jesus Soares dehan Profesór sira tenke hanorin estudante sira tuir metodolojia la’ós uza violénsia hodi transmite siénsia ba estudante sira iha eskola.
Nia dehan, governu implementa ona polítika zero toleránsia ba violénsia, tanba ne'e bainhira profesór mak hanorin estudante utiliza violénsia mak sei hetan prosesu.
"Maibé Ministériu Edukasaun nafatin kumpri lei zero toleránsia ne'e, tanba profesór se de’it mak hanorin estudante sira ho violénsia mak sei prosesu tuir lei ne'e rasik," Ministra Edukasaun Dulce dehan iha Vila-Verde.
Nia hatete maské iha inan aman balun dehan ME tenke autoriza profesór sira baku estudante iha eskola bainhira lee no konta matemátika la hatene, atu nune'e sira bele estuda hodi hatene ba la baku entaun estudante sira sei la hatene buat ida maibé ida-ne'e la autoriza.
Tanba ne'e nia dehan profesór sira hanorin estudante ho metodolojia oi-oin ne'ebé sira hetan ona iha formasaun.
"Ita estadu ida ne'ebé hola parte ba konvensaun direitu labarik, tanba ne'e la autoriza violénsia iha eskola," ME informa.
Nia dehan antes ne'e seidauk implementa polítika zero toleránsia ne'e violénsia barak mak akontese iha eskola, maibé depois de implementa polítika zero toleránsia ne'e violénsia iha eskola komesa menus to'o ohin loron.
Entretantu, inan Jacinta Ferreira Tilman dehan, polítika zero toleránsia ne'e di’ak tebes atu bele redús violénsia entre profesór no estudante sira iha eskola.
"Ita hatene katak profesór sira mós iha estratéjia rasik hodi transmite siénsia ba estudante, nune'e mós iha maneira rasik oinsa bele dadaun estudante nia konsentrasaun iha aula laran," nia dehan.