Segunda, Junho 24, 2024
Total visitors: 766366

Sekretario Estadu Ensino Sekundariu Jeral no Tekniku Vokasionál, Domingos Lopes Lemos hateten Ministeriu Edukasaun no Ministeriu Saúde servius hamutuk ho parseru Organizasaun Mundiál Saúde ho apoiu fundu husi ajensia KOICA, estabelese klinika eskola dahuluk iha Ensino Baziku Central 10 Dezembru, Dili, ho objetivu atu fornese pakote kuidadu saúde primaria ba estudantes no professor sira, liu-liu tratamentu saúde imediata no edukasaun promosaun saúde.

Sekretario Estadu Ensino Sekundariu Jeral no Tekniku Vokasionál, Domingos Lopes Lemos hateten Ministeriu Edukasaun no Ministeriu Saúde servius hamutuk ho parseru Organizasaun Mundiál Saúde ho apoiu fundu husi ajensia KOICA.

Nia dehan governu no parseru servisu sira iha dever atu kria fasilidade no kondisaun sira hodi garantia estudante sira iha asesu ba asistensia saúde no edukasaun ne’ebé kualidade.

“Inisiativa ida ne’e dezenvolve hamutuk entre Ministeriu Edukasaun no Ministeriu Saúde ho objetivu atu fo fatin ne’ebe konfortavel no seguru ba estudante sira atu simu kuidadu saúde primaria, monitorizasaun nutrisaun no edukasaun ba sáude.

“Prezensa enfermeiru iha eskola sei kontribui ba deteksaun sedu husi problema saúde nian no promove costume saúdavel ba labarik sira no familia hodi kria ambiente ne’ebé saúdavel no seguru,” nia hateten hafoin partisipa iha serimonia lansamentu sala saúdavel iha eskola EBC 10 Dezembru Comoro, Dili.

Nia hateten professor sira no inan aman iha responsabilidade atu hakbi’it labarik sira utiliza espasu ne’e hodi hetan tratamentu saúde no partisipa ativu iha atividade edukasaun promosaun saúde ne’ebé profesionais saúde sira halao.

“Estudante doben sira, sala ida ne’e ba imi. Iha ne’e imi sei hetan professional saúde ne’ebé disponviel fo kuidadu ba imi nia saúde no moris diak. Aproveita espasu ida ne’e halo pergunta, klarifika duvida no simu orientasaun konaba meus kuidadu imi nia saúde fisiku no mental,” nia apela ba estudante sira.

Entretantu, Diretór Eskola EBC 10 Dezembru, Nicolau Amaral husu Ministeriu Edukasaun atu aumenta tan guarda seguransa iha eskola hodi asegura fasilidade sira ne’ebé estabelese ona inklui klinika ne’e tanba iha ekipamentu mediku barak.

“Ami nia preokupasaun mak kestaun seguransa ne’e importante, ita bele kria fasilidade ho kondisaun diak, maibe seguransa la maximu bele prejudika tanba ne’e bele aumenta tan guarda eskola atu koloka tuir nesesidade eskola,” nia hateten

Nia dehan sira iha ona guarda seguransa nain rua (2) ne’ebé halo rotasauns servisu iha parte dader no lokraik, maibe kalan laiha tanba ne’e presiz atan ema nain rua hamutuk hat atu bele asegura segurasna iha parte dader, lokraik no kalan.

Nia haktuir total estudante hamutuk nain 830 no profesores, pessoal administrasaun inklui guarda eskola hamutuk nain 51.

Iha parte seluk, Enfermeira destakada iha klinika EBC 10 Dezembru, Idinha de Jesus Viegas Lobo Belo hateten iha fulan-dezembru tinan 2023, hahu ona fo atendimentu saúde ba estudante sira no moras ne’ebé rejista makas mak infesaun respiratoriu aguda no kabun moras.

“Dalabarak alunus sira sofre moras influensia hanesan mear, isin manas no kabun moras tanba impaktu mudansa klimatika,”nia hateten.

Nia informa durante fulan tolu nia laran, rejista ona estudante hamutuk nain 50, no sira ne’e hetan rekuperasaun depois simu tratamentu no akonselamentu.

Tuir observasaun TDW iha trenu, klinika ka sala saúdavel ne’e iha kama hamutuk rua, armari rai aimoruk no konsumível nian inklui ekipamentu mediku seluk atu fo tratamentu ba kanek, monitoriza estadu nutrisaun no planfeitu informasaun konaba saúde nian.