- Publika iha: 01 Maio 2024
Reitór Universidade Nacional Timor Lorosa’e (UNTL), João Soares Martins hateten, durante ne’e UNTL fó ona prazu fulan 18 ba estudante la ativu na’in 92554 husi tinan 2000-2012 no naran tama iha lista Drop Out hodi reativa fali sira-nia atividade iha kampus.
Husi total refere estudante na’in 410 deit mak halo readmisaun hodi kontinua fali sira-nia atividade nune’e bele remata sira-nia estudu.
“Antes ne’e mak ami fó tiha ona prazu ho durasaun fulan 18, hahú husi fulan Agostu 2022 ate mai agora fevereiru 2024. Sira-ne’e só ema 410 de’it mak mai hodi reativa sira-nia atiividade. Ami fó tiha oportunidade ona maibé ladun barak,” dehan Reitór Martins foin lais iha kampus UNTL, Díli.
Nia salienta tan katak tanba estudante sira na’in 410 deit mak husi total bo’ot mak fila fali ba universidade, universidade fó tan tempu fulan 6 atu sira seluk bele hakbesik ba universidade hodi husu reativa fali sira-nia naran nu’udar estudante ativu iha UNTL.
Iha fatin hanesan, Vise-Reitór Asuntu Akadémiku no Garantia Kualidade (VRAAGQ), Universidade Nacional Timor Lorosa’e, Samuel Venâncio de Sousa Freitas, estudante la ativu sira, ne’ebé UNTL simu husi tinan 2000-2012, ho total ema na’in 9255 mak tama ona iha lista drop out tanba ne’e fó tan tempu ba sira atu mai halo resjistrasaun hahú husi fulan abril to’o 31 outobru ne’e.
“Tuir dadus ne’ebe rejista iha Sistema Informasaun Rejistu Akademiku (SIRA) hamutuk 51.258. Iha faze dahuluk sei fó uluk ba sira ne’ebé halo matrikula hahú husi 200-2012. Hahú husi fulan abril to’o fulan outubru tinan 2024. Ba faze I ne’e estudante na’in 9255 mak naran tama ona iha lista drop out nian,” dehan Vice Reitor Samuel.
Vise-Reitór mós hatutan, estudante hamutuk na’in 9255 mak la ativu, ne’e mai husi fakuldade 9, inklui Faculdade de Agrikultura 1328 pesoas, Faculdade de Engenharia Ciência e Teknolojia 1160 pesoas, Faculdade de Educação, Artes e Humanidades 2796 pesoas, Faculdade de Medisina e Ciência da Saude 72 pesoas, Faculdade de Ekonomia e Gestaun 1571 pesoas, Faculdade de Ciências Sociais 1926 pesoas, Faculdade de Direito 197 pesoas, Faculdade de Ciências Exatas laiha, Faculdade de Filosofia e Ciência Humana 15 pesoas, No. Faculdade de Turismo Artes e Indústria Criativas e Culturais 190 pesoas.