Governu Deside Integra Tais Ba Kurríkulu Eskolár

Governu liuhusi no Ministeriu Juventude Desportu no Arte Kultura (MJDAC) hamutuk ho Ministériu Edukasaun (ME) deside ona hodi integra tais ba iha kurríkulu eskolár iha ensinu báziku iha 3 siklu.

Ministru MJDAC, Nelio Izac Sarmento dehan, tais hanesan patrimóniu kultutál Timor-Leste nian ne’ebé mak estadu defende hanesan produtu kultural, tanba ne’e governu tenke perserva liuhusi integra ba iha kurríkulu.

“Ami deside hodi integra ba edukasaun hodi tau iha kurríkulu no sai hanesan matéria ida hodi hanorin ba estudante jerasaun foun sira hodi bele hatene kona-ba historia tais nian no oinsa halo produsaun ba tais,” Ministro dehan iha salaun INFORDEPE, iha Balide, Díli.

Nia dehan, integrasaun tais ba kurríkulu eskolár ne’e liuhusi peskiza lubuk ida ne’ebé mak sira halo no sai hanesan matéria ne’ebé mak diak no ME bele konsidera sai hanesan matéria edukasaun ensinu ba iha 3 siklu.

“Bainhira ita la tau iha kurríkulu hodi hanorin ba estudante sira iha eskola mak ita-nia jerasaun foun sira sei la hatene halo produsaun ba tais,” MJDAK Sarmento hatete.

Tanba ne’e nia dehan, tais ne’e la’ós soru deit maibé iha buat barak ne’ebé mak atu aprende, hanesan, kona-ba tais ne’e rasik, kabas no kores, motif, no historia tais nian rasik.

“Ita lakohi ideia sira-ne’e lakon, no ita prejisa introduz ida-ne’e iha eskola, atu nune’e ita-nia labarik foin sa’e sira bele aprende,” nia informa.

Iha fatin hanesan, Ministra ME, Dulce de Jesus Soares, dehan dadaun ne’e ministériu halo ona revizaun ba kurríkulu 3 siklu nian hodi integra tais ba iha kurríkulu eskolár.

“Ita Ministériu Edukasaun iha responsabilidade bo’ot atu garante no fó kuntinuidade liuhusi kurríkulu eskolár, tanba ita-nia oan estudante sira mak futuru nasaun nian. Sira mak ema ne’ebé sei kontinua kultura ida-ne’e. Ita tenke produs hodi fó ba estudante sira estuda atu nune’e ita bele garante nia sustentabilidade,” Ministra informa.

Nia dehan, tais ne’e sei integra ba iha disiplina ida naran Arte no Kultura, ida-ne’e simples no la presiza buka tan matéria tun-sa’e, maibé kompletu ona hein jere deit tempu atu estuda kada klase sira.

Nia dehan dadaun ne’e integra deit ba iha ensinu baziku 3 siklu no tinan oin sei integra mos ba sekundariu, tanba tais ne’e tama iha materia interdisiplinar la’ós iha kultura deit, tanba tais ne’e riku soin ne’ebé mak bo’ot tebes iha Timor-Leste.