Segunda, Junho 24, 2024
Total visitors: 766366

Primeiru-Ministru (PM) Kay Rala Xanana Gusmão dehan, governu tenke kria Universidade Katólika ida iha Soibada, iha Munisipiu Manatuto, hodi prezerva importánsia edukasaun, tanba Soibada hanesan sentru formasaun língua Portuguesa no Filozofia.

Primeiru-Ministru (PM) Kay Rala Xanana Gusmão dehan, governu tenke kria Universidade Katólika ida iha Soibada.

Nia dehan, Soibada, hanesan sentru ba formasaun língua Portuguesa ba mestre sira ne’ebé hanorin iha koléjiu sira, misaun nian, no hamosu lider sira Timoroan.

"Ita tenke kria fali Universidade Katólika ida iha Soibada, hodi bele prezerva fali edukasaun iha Soibada nian, nune'e mós língua Portuguesa hodi prepara jerasaun foun sira iha futuru," nia dehan iha salaun INFORDEPE, iha Balide Díli.

PM Xanana dehan, tuir nia haree seidauk iha eskola ne’ebé hanorin feita ho língua Portuguesa, maibé so igreija de’it, tanba ne'e mak tenke estabelese Universidade Katólika ida iha Soibada.

"Língua Portuguesa mós sai ona hanesan kultura no patrimóniu iha pasadu liga ho kolonializasaun Portugues mai Timor-Leste no hanorin uluk iha Soibada, tanba ne'e mak ita hakarak prezerva fali edukasaun iha Soibada, " PM Xanana salienta.

PM hatutan tan katak estabelesimentu Universidade Katólika iha Soibada ne'e iha kooperasaun ho parte igreija liuhusi Bispu sira.

Entretantu, Deputada Maria Angelina Sarmento dehan Soibada ne'e fatin istóriku ba relizioju nune'e mós ba Língua Portuguesa.

"Governu estabelese Universidade Katólika ne'e tenke espesifiku ho língua Portuguesa, nune'e bele promove joven sira hodi perepara sira-nia futuru no nasaun nia futuru, nune'e mós promove istória Timor-Leste nian," nia dehan.

Deputada Sarmento hatutan governu iha poder hotu, atu bele halo fali prezervasaun ba fatin istóriku sira iha rai laran.