Segunda, Junho 24, 2024
Total visitors: 766366

Prezidente Institutu Nasionál Estatistika Timor-Leste (INETL), Elias Freitas, hateten relatóriu sensus 2022 hatudu alunu sira asesu ba edukasaun seidauk la'o tuir idade, tanba tuir loloos grupu idade tinan 5 to’o 11 tama ona ba ensinu báziku, maibé realidade ema ho idade 15-16 ba leten mós sei nafatin eskola iha ensinu baziku.

Prezidente Institutu Nasionál Estatistika Timor-Leste (INETL), Elias Freitas, hateten relatóriu sensus 2022 hatudu alunu sira asesu ba edukasaun seidauk la'o tuir idade.

“Tuir loloos ne’e ema idade 5-11 anus ne’e tenke asesu ona ba ensinu báziku maibé, haree ba realidade komunidade sira ne’ebé hela iha área rural, ne’e susar atu asesu ba eskola, tanba eskola dook bainhira sira sei ki’ik sira labele la'o dook, no sira labele la'o mesak, tanba ne’e mak sai problema ba sira nia estudu. Dala ruma mós tempu udan mota tun, entaun sira ki’ik ne’e labele atu hakur mota, entaun ida-ne’e mak sai problema ba sira, sira tama ensinu báziku ho idade 15-16 anus ba leten,” nia dehan iha salaun Ministério Finansas, Aitarak Laran, Díli.

Iha sorin seluk, Ministra Finansas (MF) Santina Cardoso hateten, dadus hirak-ne'e fornese koñesimentu kona-ba posibilidade atu entrega ka fó asisténsia eskola durante pandemia COVID hanesan hatudu iha dadus edukasaun. Maizumenus labarik 1 husi labarik 4 ho idade entre tinan 6-11 ne'ebé la eskola iha 2022mak ne'ebé aas tebes.

“Análize ne'e hatudu mós katak taxa literasia agora to'o ona 71%. Nivel literasia entre joven sira mak 87%, ne'ebé hadi'a husi rezultadu sensus ikus. Maibé presiza taka lakuna entre grupu vulneravel balun. Porezemplu, entre ema ho defisiénsia sira, 24% de'it mak bele lee no hakerek kompara ho 71% ba ema la ho defisiénsia sira,” nia dehan.

Nia dehan, presiza tau atensaun ba eskola, tanba ida ne’e importante, tanba ita hare ba relatóriu ne’e hatudu hela katak ema ne’ebé asesu ba edukasaun ensinu báziku ne’e la tuir idade, tanba ema ne’ebé idade 15-16 anus ba leten ne’e tenke ba ona ensinu sekundária, maibé agora ema idade 15-16 ne’e sei iha hela ensinu báziku ida ne’e labele akontese tan.