Segunda, Junho 24, 2024
Total visitors: 766366

Governu Brunei Darussalam kompromete atu oferese bolsa estudu iha área rua inklui turismu no hospitalidade ba Timoroan sira hodi ba hala'o estudu iha nasaun Brunei.

Governu Brunei Darussalam kompromete atu oferese bolsa estudu iha área rua inklui turismu no hospitalidade ba Timoroan sira.

Embaixador Brunei Darussalam iha Timor-Leste, Awang Hadfi Luftan dehan, bolsa estudu refere inisiativa husi kompaña Daikyo Took liuhusi Embaxada iha Timor-Leste hodi fó bolsu estudu ba Timoroan sira.

"Bolsu estudu ne'e ba etapa primeiru ita fó oportunidade ba bolseiru nain 2 hodi estuda iha área hospitalidade no turismu durante tinan ida fulan 6 iha Brunei Darussalam," nia salienta.

Nia informa sira oferse bolsa estudu iha área rua refere tanba kontribui tebes ba promove turismu no kultura.

"Bolsa estudu ne'e ita sei kontinua no la’ós ba de’it iha área rua ne'e, maibé sei haree mós ba área seluk ne’ebé mak interesante no orsamentu ba programa bolsu estudu ne'e hamutuk $17,000," Embaxador Luftandehan.

Iha fatin hanesan, Ministro Ensinu Supérior Siénsia no Kultura (MESSK), José Honório da Costa Jerónimo dehan, agradese ba Governu Brunei Darussalam ba laran luak hodi oferese bolsu estudu ba Timoroan sira.

"Ha’u husu atu sira bele aumenta tan bolsa estudu ba ita-nia Timoroan sira liu-liu ba sira ne’ebé iha koñesimentu ba lian Inglés," nia hatete.

Nia dehan, ida-ne'e primeiru pasu ba Brunei halo kooperasaun ida ne’ebé diak ho Timor-Leste liu-liu ho MESSK importante tebes.

"Importante tebes, tanba bele fó oportunidade ba ita-nia joven Timoroan sira hodi bele ba aprende iha Brunei Darussalam," Ministro Jerónimo hatete.

Ministro mós husu ba estudante benefisiariu nain rua atu haka'as an eskola halo diak atu nune'e remata sira-nia estudu atu bele fila mai Timor-Leste hodi kontribui ba dezenvoliventu, tanba Timor presiza rekursu ne’ebé adekuadu.

Entretantu estudante benefisiariu, Atanasio Afonso, dehan orgullu tebes tanba bele hetan oportunidade ida-ne'e hodi hala'o estudu iha Brunei Darussalam.

"Ha’u orgullu tebes, tanba husi ami lubuk ne’ebé mak partisipa iha teste ne'e, ha’u bele pasa hodi hala'o estudu kona-ba área hospitalidade iha Brunei Darussalam durante tinan ida fulan 6," nia informa.