- Publika iha: 19 Junho 2024
Sekretáriu Tékniku Timor-Leste Coalition for Education (TLCE) husu Ministériu Edukasaun atu koloka profesór sira ba munisípiu tenke tuir artigu 57 hodi proteje sira.
Koordenadór Tékniku TLCE, Jose Monteiro dehan, iha artigu 57 lei funsan públiku nian katak, kuandu halo destakamentu funsionáriu públiku liu-liu profesór sira ba remota tenke konsidera risku hirak ne’ebé mak implika ba dezempeñu funsionáriu ida nian.
"Tuir artigu 57 katak, bainhira deskata funsionáriu liu-liu ba profesór ba munisípiu tenke halo uluk jestaun risku, nune'e mós kria kondisaun hanesan uma atu sira hela ba hodi hanorin," nia dehan.
Nia dehan, liga ba realidade ne’ebé foin lalais akontese Ministériu Edukasaun koloka profesór sira ba munisípiu, la tuir artigu 57, tanba la kria kondisaun no halo jestaun risku.
"Ita rekomenda ba Ministériu Edukasaun atu kria uluk kondisaun molok koloka profesór sira ba munisípiu, tanba munisípiu balun risku ba konflitu, tanba ne’e prepara fatin seguru ba sira nune'e sira bele hela iha fatin seguru no dignu hodi kontribui ba dezenvoliventu," TLCE Monteiro husu.
Entretantu, Ministra Edukasaun Dulce de Jesus Soares dehan, rekrutamentu ba profesór ne’ebé destaka ba munisípiu ne'e bazeia ba dekretu lei númeru 81/2023 nain.
"Ita koloka profesór sira ba munisípiu ne'e, ita bazeia ba lei númeru 31/2023 ne'e fó dalan ba Ministériu Edukasaun hodi koloka profesór sira ba hanorin iha munisípiu, maské ho kondisaun ne’ebé ita kria seidauk másimu," nia informa.
Iha parte seluk profesór Ezildo Caldeira dehan, hanesan profesór, maské kondisaun ne’ebé mak seidauk dignu ba sira hela hodi hanorin, maibé nafatin esforsu hodi kontribui ba dezenvoliventu.
"Ami hakruk ba termu aseitasaun ba juramentu ida katak, ami prontu serbí Estadu Timor-Leste iha ne'ebé de’it, tanba atu kontribui ba ita-nia rain hanesan profesór tenke prontu hodi serbí estadu ida ne'e liuhusi área edukasaun nian no iha áreane'ebé deit," nia salienta.