Komunidade Suku Lissadila Husu Governu Funsiona Edifísiu ETV

Komunidade Suku Lissadila Postu Administrativu Maubara Munisípiu Liquiça husu governu liu-liu Ministériu Edukasaun atu funsiona edifísiu Eskola Ténika Vokasionál (ETV)ne’ebé konstrui iha suku refere.

Xefe Suku Lissadila Fernando Lobo dehan, edifísiu eskolar refere iha tinan 2017 Exelénsia Ministra Edukasaun atual sei haensan Vise-Ministra Edukasaun rasik mak ba husu rai mamuk atu konstrui edifísiu ETV ida iha suku refere hodi fasilita estudante sira ne’ebé hakara aprende no komunidade oferese rai ne'e ba governu hodi halo konstrusaun.

Nia dehan, konstrusaun ba obra ne’e hahú iha tinan 2019 no remata iha tinan 2021, maibé, to'o agora edifisiu ne’e abandona no la utiliza, no duut sa'e nakonu no animal liuliu bibi sira mak hela iha edifísiu eskolár ne'e.

"Lori komunidade hotu iha Suku Lissadila husuba governu liu-liu Ministériu Edukasaun atu funsiona edifísiu Eskola Tékniku Vokasionál (ETV) ne’ebé finaliza ona nia konstrusaun iha tinan 2021, maibé to'o ohin loron la utiliza hodi loke Eskola Tékniku Vokasionál iha suku ne’e," Xefe Suku Lissadila Lobo husu.

Nia dehan, konstrui edifísiu ne’e, tanba atu loke Eskola Tékniku Vokasionál ida iha suku refere, tanba suku refere sai hanesan fatin sentral ida ba komunidade sira husi suku Guiço parte Faularan nian, Lissadila, Maubaralissa no parte sorin husi Munisípiu Ermera Suku Asulau nian.

“Nafatin ezije ba IX (Nonu) Governu liuhusi Ministériu Edukasaun katak tinan 2025 bele loke ona eskola ne’e, tanba estudante sira hein hela aula aprendisajen," nia informa.

Tanba ne'e nia dehan, Eskola Tékniku Vokasionál ne’ebé governu promete atu loke ne’e tenke loke ona, tanba edifísiu eskolár refere gasta osan povu nian hodi konstrui, maibé la utiliza no abandona de’it.

Entretantu Ministru Edukasaun Interino Domingos Lopes Lemos dehan, hala’o ona vizita ba edifísiu hodi haree direita kondisaun edifísiu eskolér ne’ebé konstrui iha Suku Lissadila ne’e.

"Ita observa direita ona kondisaun edifísiu Eskola Tékniku Vokasionál ne’e di’ak hela presiza hamoos no pinta hadia fila fali no posibilidade tinan oin ita bele halo netik buat ruma iha edifísiu ne’ebé mak dadaun ne'e abandona, tanba ne'e husu ba autoridade lokal sira atu halo hela sosializasaun ba komunidade sira iha suku refere," nia infora.

Enkuantu edifísiu ETV refere kompostu husi sala de aula 6 no haris-fatin 2 no eskritóriu ida ba profesór sira.