- Publika iha: 01 Dezembro 2024
Prezidente Repúblika José Ramos Horta husu Universidade Nacional Timor Lorosa'e (UNTL) tenke moderniza sistema ensinu, hodi dezenvolve liutan nia kualidade tanba, ensinu superiór privadu balun sistema ensinu ne'e modernu tebes.
Nia dehan, ensinu superiór privadu balun iha Timor-Leste ne’ebé mak dadaun ne'e ativu sira-nia sistema aprendisajen ne'e modernu tebes.
"Husu governu liu-liu Ministériu Ensinu Superiór Siénsia Kultura (MESSK) tenke moderniza sistema jestaun aprendisajen hodi bele eleva nia kualidade," Prezidente Repúblika Horta dehan.
Nia dehan, governu tenke investe liu-liu investimentu iha infraestrutura, investimentu ne’ebé bo'ot, entaun governu tenke tau osan ne’ebé bo'ot nune'e bele moderniza saladeaula, sala enkontru no seluk tan.
"Governu tau matan ba UNTL liu-liu investimentu iha infraestrutura hodi moderniza liutan sistema ensinu," nia informa.
Nia dehan, tinan ruanulu resin ona (20-resin) ona UNTL prodús ona 40 mil estudante povu Timor-Leste nia oan, númeru ida ne’ebé bo'ot, signifika katak la'ós fasil halo jestaun, tanba ne'e presiza governu nia tulun ba universidade refere.
Alende ne'e nia dehan, estadu tenke konsentra nia atensaun ba UNTL atu sai universidade ida nivel rejionál liuliu iha Sudeste Aziátiku nain.
Entretantu Ministru Ensinu Superiór Siénsia no Kultura (MESSK) José Honório da Costa Pereira Jerónimo dehan, tempu to'o atu moderniza sistema ensinu iha UNTL.
"Moderniza sistema ensinu sistema ensinu iha UNTL, reitór rasik ho nia estrutura tomak mak tenke hanoin, hodi hadi'a tanba Universidade Nacional Timor Lorosa'e (UNTL) universidade públika ne’ebé kada tinan governu sempre apoiu, dalabarak ha'u sempre dehan, hadi’a sira-nia jestaun no tenke moderniza sistema ensinu, tanba tempu to'o ona atu hadi’a falla hirak ne’e," nia salienta.
Iha fatin hanesan, Reitór UNTL João Soares Martins dehan, kona-ba moderniza UNTL agora dadaun ne'e la'o hela no sei moderniza fazeadamente.
"Ami lansa ona digitalizasaun, ita hakat ho pasu digitalizasaun administrasaun akadémika, admistrasaun finanseriu, projetu lojístika, patrimóniu, atu ema hotu bele fasil asesu ho lais liu, maske dezafiu barak ita hasoru," nia dehan.
Nia dehan, investimentu ba moderniza ne'e governu mós tenke tau osan nune'e bele moderniza.