Quarta, Fevereiro 19, 2025

Governu Xina liuhusi Embaxada iha Timor-Leste, hamutuk ho (UNICEF) halo apoiu rekuperasaun ba eskola hamutuk 34 ne'ebé mak afetadu ba inundasaun iha tinan 2021.

Governu Xina liuhusi Embaxada iha Timor-Leste, hamutuk ho (UNICEF) halo apoiu rekuperasaun ba eskola hamutuk 34 ne'ebé mak afetadu ba inundasaun iha tinan 2021.

Embaxadora Xina iha Timor-Leste, Wang Wenli hatete, apoiu rekuperasaun ne'e liuhusi materiál ensinu aprendizajen nian ba eskola sira ne'ebé afetadu ba inundasaun hodi rekupera fali prosesu aprendizajen.

"Eskola 34 ne'e identifika hodi apoiu rekuperasaun ne'e husi munisípiu Díli, Covalima no Bobonaro. Ida-ne'e nu'udár apoiu rekuperasaun ba sira-nia prosesu aprendizajen nia," nia informa.

Nia dehan, apoiu ida ne’e Governu Xina no UNICEF, halo hodi ajuda setór edukasaun hodi harii no hametin fali hodi hasoru eventu ambientál ne'ebé maka'as hanesan inundasaun. Materiál ensinu aprendizajen sira-ne'e apoiu estratéjia atuál sira ministériu nian atu fó nafatin edukasaun ho kualidade no inkluzivu ba labarik hotu.

"Iha Abril 2021 inundasaun iha Timor-Leste tomak hamosu estragu boot ba infraestrutura públika, inklui eskola 34 no sentru formasaun ba profesór sira.

Estragu ba edifisiu eskola nian, hamutuk ho fase materiál no mobiliáriu eskola nian, perturba aprendizajen iha eskola sira ne'ebé afetadu, presiza asisténsia rekuperasaun, no presiza apoiu atu harii sira-nia reziliénsia ba posibilidade dezastre naturál hanesan iha futuru," nia dehan.

Nia hatete, Xina ho Timor-Leste nu'udar nasaun ne'ebé tradisionalmente belun.

“Ami hein apoiu material ida ne'e bele ajuda hadi'a kondisaun aprendizajen ba labarik Timor-Leste, apoia sira hodi realiza sira nia mehi, no enkoraja sira atu sai ai-riin ba dezenvolvimentu nasaun nian,” dehan nia.

Entretantu Country Representative UNICEF, Patrizia Digiovanni, hatete, apoiu ida-ne'e hanesan onra no ksolok boot ida atu halo parte iha eventu importante ida-ne'e hodi entrega materiál ensinu no aprendizajen esensiál sira ba eskola 34 ne'ebé afetadu hosi inundasaun iha 2021.

"Rekuperasaun husi katástrofe ida ho natureza ida-ne'e presiza tempu no ezije responsabilidade koletiva sira. Eventu entrega ohin nian, tanba ne'e maka rezultadu ida hosi viajen naruk ida ne'ebé Ministériu Edukasaun lori ona hodi apoia rekuperasaun la'o hela iha eskola afetadu sira. Doasaun sira ho laran-di'ak ida-ne'e hosi Governu Xina, sei ajuda tebes hodi prienxe nesesidade barak ne'ebé mosu husi destruisaun sira iha eskola sira tanba dezastre," nia dehan.

Nia dehan, apoiu ne'e inklui kadeira eskola nian, meza, no sasán eskritóriu nian, ne'ebé sei ajuda labarik sira atu kontinua ho sira nia edukasaun.

Iha parte seluk Ministra Edukasaun (ME), Dulce de Jesus Soares, agradese ba Governu Xina no UNICEF, tanba bele tulun ona eskola sira ne'ebé afeta ba inundasaun iha tinan 2021.

"Mezmu ita tama ona ba 2024, maibé sira kontinua reforsa eskola ida-ne'e atu bele rekupera fila fali sasán sira ne'ebé lakon iha tinan hirak liuba, nune'e mós reforsa liután sira-nia prosesu aprendizajen.

Ho ida-ne'e lori Governu Timor-Leste nia naran liuhusi ME agradese ba UNICEF no Embaxada Xina ne'ebé sai parseiru tinan naruk ona ho ME, hodi apoiu iha área oin-oin liuliu dezenvolvimentu kurríkulu, formasaun profesór inklui infrastrutura no ohin sira mós fo tan matéria didátiku sira," nia informa.

Enkuantu apoiu rekuperasaun ne'e hahú uluk ba EBC Sérgio Vieira de Melho mak hanesan, kadeira ba estudante hamutuk rihun rua (2.000), kadeira no meza ba profesór 204, restante livru 204 no sasán eskritóriu oioin.