- Publika iha: 26 Dezembro 2024
Uniforme eskolár iha modelu 4 mak ne’ebé sei uza ba eskola Pre-eskolár, ensinu báziku, ensinu sekundáriu jerál sekundáriu tékniku vokasionál sira iha Timor-Leste.

Ministra Edukasaun Dulce de Jesus Soares dehan, ME lansa ona uniforme nasionál eskolár no modelu oin haat (4) tuir nivel eskolár sira iha Timor-Leste.
"Modelu oin haat (4) hanesan, matak no mutin ba eskola Pre-eskolár, mutin no soklat (Kor-kafé) ba ensinu báziku, azul eskuru no mutin ba ensinu sekundáriu jerál no kor metan no mutin ba sekundáriu tékniku vokasionál ne'e fixu ona," nia dehan.
Nia dehan, uniforme nasionál eskolár oin haat (4) ne'e mak estudante sira sei utiliza iha ano letivu 2025 nian.
"Hahú ano letivu tinan 2025 ne'e estudante hotu hahu husi pre-eskolár to'o ensinu sekundáriu jerál no tékniku vokasionál hotu tenke utiliza uniforme eskolár tuir nivel ida-idak nian ne'ebé mak ohin ita lansa ona," nia informa.
Nia dehan, ba oin sei la iha tan uniforme eskolár barak, tanba ida-ne'e sei fó impaktu ekonómiku ba inan-aman, tanba farda ne'e utiliza hahu husi segunda to'o sexta, no sei la troka tan.
"Uniforme nasionál eskolár ne'e estudante hotu iha Timor-Leste atu uza la'os de'it ba eskola públiku, maibé ba mós eskola privadu sira," Ministra Edukasaun Soares salienta.
Entretantu Deputadu Antonio Verdial de Sousa dehan, uniforme eskolár ne'e di'ak tebes atu nune'e estudante hotu bele utiliza tantu eskola públiku no privadu nune'e bele haree ne'e rapidu no organizadu.
"Ida mós hafasil inan-aman sira bele sosa ba oan sira utiliza ba eskola ho folin ne'ebé mak baratu," nia hatete.
Nia dehan, espera katak molok hahú anu letivu foun estudante hotu iha ona uniforme nasionál eskolár ne'e hodi ba partisipa prosesu aprendizajen iha eskola.