Terça, Novembro 24, 2020
Total visitors: 536534

Sekretaria Estado Igualidade no Inklusaun (SEII), Maria José da Fonseca Monteiro de Jesus hateten Orsamentu Geral do Estado (OJE) 2020, preve $48,000 husi total ano fiscal $959,910 atu apoia grupo feto sira halao atividade ekonomia no dezenvolve sira nia negosio iha rai laran.

Sekretaria Estado Igualidade no Inklusaun (SEII), Maria José da Fonseca Monteiro de Jesus hateten Orsamentu Geral do Estado (OJE) 2020, preve $48,000 husi total ano fiscal $959,910 atu apoia grupo feto sira halao atividade ekonomia no dezenvolve sira nia negosio iha rai laran.

Nia salienta, periodu duoidesimu iha programa balun la iha fleksibilidade tanba ne’e husi montante $959,910, sira ezekuta ona $500,000 no sei hela $400,000 resin atu ezekuta, liu-liu halao atividade sira hanesan kampaña loron 16 aktivismu kontra violensia bazeia ba jeneru no monitorizasaun no akompañamentu ba grupo benefisiariu sira.

“Ita iha 84 grupos ne’ebe ita fo apoia ba sira. Sira nafatin lao no grupo balun ami enkoraja sira suku maskara iha periodu estado emergensia hanesan iha grupo ida iha Munisipio Bobonaro sira konsegue hetan rendimentu $4,000 husi atividade suku maskara. Grupo ne’e tama iha ami nia mekanismu rotativu entaun sira fo osan $2,000 fila tiha no sira sei iha $2,000 atu kontinua sira nia atividade negosio,” nia hateten hafoin halo audensia publika ba orsamentu 2020 ho komisaun F iha parlamentu nasional.

Nia dehan, empoderamentu ekonomia sai nafatin programa prinsipal atu kontinua tanba ne’e iha tinan kotuk sira introdus mekanismu rotativu ho grupo pilotu atu ejiji sira ezekuta osan ho responsabilidade hodi hadia ekonomia familia.

Nia hatutan, inisiativa foun ne’ebe sira halao mak estabelese sentru empoderamentu iha munisipio hotu inklui Rejiaun Administrativu Espesial Oecusse Ambeno (RAEOA) atu asegura implementasaun programa sira hotu iha nivel munisipiu to’o aldeia.

Nia informa, programa principal SEII nia mak kombate violensia domestika, violensia bazeia ba jeneru, hasa’e partisipasaun feto no maluk defisiente, no komunidade LGBTI sira iha vida politika no foti desizaun, emporamentu ekonomia no halo advokasia ba linha ministerio kona ba politika abordajen integradu jeneru hodi asegura politika, leis no planu orsamentu sensivel ba grupo vulneravel sira inklui feto, ema ho defisiensia, no LGBTI sira.

“Hau fiar katak hotu-hotu iha hanoin hanesan katak promosaun igualidade no inkluzaun ne’e importante entau instituisaun hotu tenke iha orsamentu naton ba ida ne’e. ami sei asegura katak ami nafatin halo advokasia atu asegura orsmanetu nafatin sensivel ba jeneru no nesesidade ema defisiente nian,” nia haktuir tan.

Nia konsiente, dezigualidade sei eziste no violensia sei a’as iha rai laran, maibe nafatin sensibilizasaun publika no advokasia atu muda sosiedade nia pensamentu patriakla no hahalok sira atu respeita malu, liu-liu grupo vulneravel sira nia direitu.

Iha parte seluk, Presidente Komisaun F trata asuntu Saúde, Seguransa Sosial no Igualidade Jeneru, Deputado Noé da Silva Ximenes hateten alokasaun orsamentu ba kategoria transferensia publika ne’e nesesario tanba sira iha grupo feto negosio ki’ik nain 84 entaun sira presiza apoia iha situasaun emergensia agora atu sira bele halao atividade ekonomika.

Nia dehan husi relatorio ne’ebe aprezenta hatudu 45 grupos benefisiariu husi 84 grupos mak iha susesu ba atividade negosio entaun iha situasaun difisil agora presiza apoia sira atu nafatin iha sustentabilidade no dezenvolve bo’ot liu tan.

“Sira nia problema loos mak sira iha grupo benefisiario hamutuk 84 iha tinan ida ne’e entaun sira nia ezekusaun orsamentu kategoria transferensia publika ne’e ita presiza duni tau atensaun,” nia hateten.

Nia espera, ho kapasidade no abilidade SEII nian bele ezekuta orsamentu ida ne’e ho diak durante fulan rua ikus ne’e atu bele apoia duni grupo industria ki’ik sira ne’e bele iha sustentabilidade ba atividade no iha rendimentu.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04