- Publika iha: 08 Outubro 2020
Diretor ONG Belun, Luis Ximenes hateten, programa feto paz no seguransa ne’ebe mak Belun halo iha munisipio sira Covalima, Baucau, no Oecusse, hodi halo kapasitasaun ba grupo feto sira, iha rezultado grupo feto 6 mak kria rasik kampo de trabalho iha area rural no mos fo serviso ba ema seluk.
“Maske ita nia programa ne’e finaliza ona, maibe ita nia grupo feto neen (6) konsegue kria rasik serviso ba sira nia an hanesan, promove produto ai-han lokal, produto tais, no oinsa asesu ba merkado nasional no internasional,” Diretor Belun Ximenes hateten.
Nai dehan, alende halo kapasitasaun ba kria kampo de trabalho, kapasita mos konaba oinsa atu fasilita vitima feto sira hodi refere sira nia kazu ba orgaun legais sira.
“Ita orgulho tebes ho kapasitasaun ne’ebe mak ita oferese ba maluk feto sira no rezultado hatudo pozitivo tebes tanba sira bele implementa duni saida mak sira hetan iha formasaun ne’e,” nia hateten.
Tanba ne’e nia dehan, maske programa ne’e hotu on, maibe Belun sei kuntinua fali ho programa seluk hodi kuntinua suporta grupo feto ba iha ambiente nian.
Entretanto, reprezentante grupo feto husi Munisipio Baucau, Estefania Magno hateten, kapasitasaun ne’ebe mak durante ne’e sira hetan, maske iha difukuldade balun maibe rezultado tuir duni sira nia hakarak.
“Antes ami seidauk hetan kapasitasaun ami la iha koñesimento oinsa atu transforma produto ne’ebe ami iha no bele hetan osan hodi sustenta ami nian moris, maibe depois de kapasitasaun ami bele kria rasik kampo serviso nune’e involve feto maluk seluk,” reprezentante grupo feto Magno hateten.
Nia dehan, aktividade ne’ebe mak nia halo, hanesan, promove produto ai-han lokal, halo kolan ikan nune’e mos suku.
“Osan ne’ebe mak ami hetan husi aktividade ne’ebe mak ami halo kada fulan balun ami fahe, balun tenke tau mos iha cas nian,” nia hateten.
Tanba ne’e hodi grupo nian naran nia agradese tebes ba Belun tanba bele fo oportunidade ba grupo feto sira, oinsa atu promove produto lokal sira nune’e mos bele partisipa iha merkado.