Sábado, Dezembro 05, 2020
Total visitors: 539094

Grupo produtor tais, Maria Martins Xavier hateten hahu tinan 2017 to’o agora rendimentu ne’ebe sira hetan husi produtu tais laiha tanba ne’e sira tenke dezenraska faan fali produtu alimentasaun hodi hetan osan selu fali kreditu ne’ebe sira foti husi instituisaun finanseiru sira.

Grupo produtor tais, Maria Martins Xavier hateten hahu tinan 2017 to’o agora rendimentu ne’ebe sira hetan husi produtu tais laiha.

Nia dehan, sira foti impresta osan husi instituisaun finanseiru Kaibauk hodi sosa material sira hodi produs tais, maibe laiha merkadu atu faan sira nia produtu sira ne’e tanba produtu tais dala barak ema estranjeiru mak sosa.

“Ami tenke halo esforsu atu hetan osan hodi selu ba banku tanba ne’e kriteria ida. Banku la hatene hakarak lakohi fulan to’o tenke selu,” nia hateten.

Nia dehan, iha grupo laran membru nain hitu no sira nain hitu ne’e foti hotu imprestimu husi instituisaun finanseiru hodi tau hamutuk dezenvolve produtu tanba ne’e sira ida-ida tenke halo esforsu atu selu kreditu ne’ebe sira foti.

Entretantu, grupo produtor tais no homan, Judite dos Santos, agradese ba komisaun organizador serimonia hanoin fila hikas trajedia Balibo Five, ne’ebe loke feira hodi fo espasu ba sira faan sira nia produtu atu bele hetan netik rendimentu oituan.

“Feira laiha ami faan iha merkadu ema la sosa entaun ami faan fali modo tahan, forumungu, koto, maibe agora mos merenda eskolar laiha tanba ne’e ema la sosa,” nia hateten.

Nia informa, feira loron rua iha Balibo ne’e sira hetan netik osan la barak, maibe oituan $5 to’o $20 dolar bele sustenta familia sira.

Iha parte seluk, durante ambitu diskusaun orsamentu jeral do estado tinan 2020, iha Parlamentu Nasional, Primeiru Ministru Taur Matan Ruak hateten nasaun hotu iha mundu ekonomia lao tenke tau atensaun ba setor informal, maibe seidauk registu ho diak.

“Ita nia rai setor informal laiha registu entaun dezafiu bo’ot ba governu, maibe governu simu ho hanoin ida ajuda sira transforma sira ba setor formal entaun ita presiza iha registu ida. Tanba ne’e insentivu ne’ebe ita fo obriga sira atu registu rasik ho ida ne’e ita defini politika klaru apoia sira ho longu prazu,” nia hateten.

Nia dehan, medida rekuperasaun primeira vaze inklui iha orsamentu jeral do estado tinan 2020 nian no iha aspeitu hat mak ida ba familia mak bolu sesta bazika, entidade empregadores, emprezariu individu sira, no trabalhador sira ne’e iha rua despeza kontributivu no subsidiu retoma.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04