Sábado, Fevereiro 27, 2021
Total visitors: 550453

Rezultado Preliminária Peskiza Ai-han no Nutrisaun tinan 2020, hatudu taxa inan ne’ebe fo susu deit oan la fo tan hahan seluk durante bebe idade 0 to’o fulan ne’en aumenta sa’e ba 64, 2% kompara ho tinan 2013, iha 62%.

Diretora Organizasaun Fundasaun Alola, Maria Imaculada Guterres hateten kontente hare iha mudansa oituan ba taxa fo susu esklusivu ba bebe sira tanba la fasil atu muda ema nia hanoin husi promosaun merkadoria susuben formula ne’ebe agresivu tebes.

Diretora Organizasaun Fundasaun Alola, Maria Imaculada Guterres hateten kontente hare iha mudansa oituan ba taxa fo susu esklusivu ba bebe sira tanba la fasil atu muda ema nia hanoin husi promosaun merkadoria susuben formula ne’ebe agresivu tebes.

“Dadus ne’ebe fo sai husi estudu ai-han no nutrisaun nian hatudu sa’e 64% ita kompara ho tinan lima liu ba iha 62%. Maske la signifikativu, maibe iha mudansa oituan. Ne’e hatudu esforsu tomak ne’ebe ita halo durante ne’e atu hasa’e taxa fo susuben esklusivu ba bebe idade 0 to’o fulan 6 ita komesa alkansa ona, hau fiar esforsu sira ne’e sei lori susesu bo’ot ida iha futuru katak bebe sira ne’ebe moris to’o fulan nen fo deit susuben inan nian la fo hahan seluk,” nia hateten iha salaun Luz Clarita, Dili.

Nia dehan presiza haforsa estrategia sira hanesan edukasaun promosaun saúde kona ba importansia fo susubeen ba bebe, suporta inan sira liu husi harii grupo voluntario saúde hodi fo akonseilamentu ba inan no familia sira.
No presiza aselera kodigu merkadoria subtitui susuben inan atu fo protesaun ba bebe no inan sira husi merkadoria susuben formula ne’ebe ikus ne’e promosaun agresivu tebes.

Nia haktuir iha supermerkadu sira industria susuben formula halo promosaun ne’ebe agresivu tebes, liu-liu sosa produtu rua gratuita ida no halo promosaun iha dalan publiku sira konaba benefisio susuben formula, ne’ebe lolos laiha nia benefisio ba bebe no inan sira nia saúde.

Nia informa iha munisipio Dili, sira forma ona grupo suporta inan hamutuk 36 iha suku 36 atu halo edukasaun promosaun saúde ba inan no oan, fo akonseilamentu ba inan sira tau matan ba labarik sira nia saúde no nutrisaun, enkoraja inan fo susu sira atu fo susu deit ona sira foin moris to’o fulan nen no kontinua fo susu to’o tinan rua. No ajuda halo referral ba kazu emergensia ruma ba fasilidade saude hanesan inan partus atu bele hetan atendimentu ne’ebe kualidade no moos.

Relatorio preliminária peskiza ai-han no nutrisaun tinan 2020, hatudu taxa inisiasaun sedu fo susuben inan ba bebe fulan 0-23 iha 63.5%, taxa susuben inan esklusivu fulan 0-6 iha 64.2%, taxa fo susuben inan to’o tinan ida iha 91.2% no kontinua fo susubeen inan to’o tinan rua iha 67.8%.

Iha parte seluk, Ministra da Saúde, Doutora Odete Maria Freitas Belo hateten rezultado peskiza ne’e sai evidensia sentifika hodi avalia progressu no dezafiu ne’ebe bele kontribui diak liu tan ba desizaun politika no estratejiku sira atu fo protesaun ne’ebe diak liu tan ba inan no oan nia saúde.

“Peskiza ne’e hatudu ita tenke involve familia no komunidade atu asesu ba produtu lokal ne’ebe diversifikadu ho kualidade nutrisional, pratika ijiene, investe asesu ba bee moos no saneamentu, promove hahan seguru no kualidade ba bebe no labarik ki’ik sira,” nia hateten.

Nia dehan governu fo atensaun makas ba kuidadu saúde primaria, liu-liu atividade edukasaun no promosaun saúde atu koalia nafatin ba komunidade uza ai-han oituan ne’ebe iha prepara ho didiak ba sira nia familia tanba han oituan ho nutriente ne’ebe a’as sei bele garantia estado nutrisaun familia nian.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04