- Publika iha: 19 Maio 2021
Iha ambitu selebrasaun loron mundial familia, ne’ebe monu iha loron 15 fulan Maio tinan 2021, Presidente Grupo Feto Parlamentar (GMPTL), Deputada Parlamentu Nasional Lidia Norberta ejiji governu tenke lalais apoia familia vulneravel sira, durante aplikasaun serka sanitaria no konfinamentu domisiliariu.
Nia dehan familia maka abut ba sosiedade tanba familia maka responsavel promove edukasaun no komportamentu diak oan sira nian hodi konstrui sosiedade ida ne’ebe harmonia, maibe wainhira familia hasoru problema barak automatikamentu fo impaktu ba papel familia nian.
“Iha orsamentu ratifikativu 2021, ita hatene orsamentu barak alokadu apoia social iha ministerio solidaridade social. Iha loron ida ne’e ami rekomenda atu bele fleksibiliza prosesu sira hodi tulun familia sira ne’ebe hasoru problema tanba hoi da ne’e ita rezolve mos problema sira seluk ne’e sira hasoru,” nia hateten iha plenaria parlamentu nasional, Dili.
Nia dehan sira mos simu keixa husi familia balun katak durante surtu pandemia sira lakon servisu no problema oioin iha familia laran tanba ne’e governu tenke hare atu evita problema krime seluk akonteste iha familia laran hanesan violensia.
Entretantu, Deputada Maria Fernanda Lay, lamenta ho servisu intervensaun governu nian ba konsekuensia desizaun serka sanitaria no konfinamentu domisiliariu tanba neineik liu.
“Servisu apoia social iha Dili deit, hau hanoin ita enfrenta problema. Familia ida hodikalan sai iha televizaun halo hau nia laran taridu tanba nia ba gadai oan ou fo oan sai garantia ida hosi selu kost, ministerio solidaridade social iha ne’ebe,” nia lamenta.
Nia hateten orsamentu jeral do estado no orsamentu ratifikativu aprovado hotu no promulgadu ona, maibe servisu apoia social sira ne’e lalao halo familia sira sai vulneravel liu tan.