Quinta, Setembro 23, 2021
Total visitors: 578526

Familia matebian ho inisial LM, husu autoridade kompetente atu halo investigasaun klean ba kazu matebian alegadamente tara aan iha kuartu laran, iha nia residensia iha Dili foin lais, tanba duvida ho akontesementu refere no familia deklara ba publiku katak matebian mos hetan violensia domestika beibeik husi nia laen.

Familia matebian ho inisial LM, husu autoridade kompetente atu halo investigasaun klean ba kazu matebian alegadamente tara aan iha kuartu laran.

Nia dehan durante moris, matebian informa ba familia sira katak nia hetan violensia fisiku husi laen no deskonfia laen iha relasaun ho feto seluk iha servisu fatin tanba hare mensagen tama iha laen nia telefone. Ikus liu iha loron 9 fulan Maio tinan 2021, matebian hasoru nia bin no koalia ho tanis katak hetan baku no habit ho odamatan halo liman no kotuk laran sira metan hotu.

“Ami ladun se maka oho, maibe ami duvida ho nia mate ne’ebe akontese. Ami husu para instituisaun kompetente sira atu halo investigasaun lolos no klean atu ami familia bele hatene alin mate tanba saida? Tara aan duni ou keta seluk karik,” familia matebian LM hateten iha Mortuario Hospital Nasional Guido Valdares (HNGV) Bidaun, wainhira hein prosesu otopsia ba mate isin.

Nia dehan antes ne’e sira hetan ona informasaun husi matebian katak tempu badak familia husi feto ki’ik atu tur hamutuk koalia lia, no familia bo’ot husi matebian mos hakarak hola parte atu hatene problema ne’ebe akontese. Maibe iha loron Domingo liu ba, familia simu telefone husi matebian nia laen katak matebian iha kuartu laran la sai odamatan save hela.

Nia hatutan wainhira alin mane nain rua ba to’o Bebonuk, matebian nia residensia sobu janela kuartu hare husi janela sira nia bin iha ona almari nia hun.

Nia informa matebian mate husi hela nia laen kaben TC no oan nain haat no hakiak tan ida. Matebian nia laen hanesan mos membru governu em ezersisiu.

Entretantu, matebian nia kaben TC lakohi fo komentario relasiona ho deklarasaun husi familia matebian nian tanba informasaun hotu nia fo ona iha autoridade kompetente Polisia Nasional Investigasaun Criminal.

“Hau laiha komentario, investigasaun lao hela. Ami oferese hotu ona informasaun ba iha polisia investigasaun criminal tanba ne’e hau labele koalia iha ne’e. No ida seluk maka hein rezultado autopsia,” nia hateten.

Iha oportunidade ne’e, nia agradese ba jornalista sira, ne’ebe halo kobertura ba nakukun bo’ot ne’ebe nia hasoru, maibe seidauk bele fo komentario klean ba akontesementu ne’e tanba sei iha prosesu investigasaun.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04