- Publika iha: 15 Junho 2021
Xefe Gabinete Kontrolu Kualidade no Komunikasaun Sosial, iha Hospital Nasional Guido Valdares (HNGV), iha Dili, Sara Maria Xavier hateten iha fulan Maio tinan 2021, inan isin rua nain 71 partu iha sala maternidade ho kondisaun positivu Covid-19.
Nia dehan inan sira ne’e positivu Covid-19 kategoria asintomatiku tanba ne’e laiha fo impaktu ba sira nia kondisaun durante prosesu partu, maibe sira hetan suporta makas husi profesional saúde sira.
“Inan sira mai partu la hein kleru iha tenda triajen, tenke lalais ba maternidade atu partu, maibe ekipa mos halo kedas teste swab. Rezultado teste positivu ita kontaktu ekipa vijilansia evakua sira inan no oan ba izolamentu tanba bebe presiza nafatin inan nia susuben. Importante maka ita fo hanoin inan sira uza maskara, fase liman beibeik atu minimiza transmisaun infesaun ba bebe,” nia hateten iha servisu fatin Bidau, Dili.
Nia hateten bebe sira ne’ebe moris laiha ida maka positivu Covid-19, maibe sira presiza inan nia susuben tanba ne’e sira mos tenke ba hotu izolamentu.
Nia hatutan seidauk iha evidensia ida hatudu akontese transmisaun introtorina, bainhira bebe iha inan nia kanotak, maibe iha posibilidade bo’ot hetan infesaun depois moris tanba ne’e presiza akompanhamentu profesional saúde sira nian ba inan sira atu fo susu oan ho seguru.
Tuir dadus iha fulan Maio tinan 2021, total inan ne’ebe partu iha sala maternidade HNGV hamutuk nain 406. Husi numeru ne’e nain 265 partu ho dalan normal, nain 116 partu Cesariana, nain 25 partu ventoja.
Iha parte seluk, Jestor Klinika Bairo Pite, Inacio dos Santos hateten iha fulan Maio, numeru inan ne’ebe partu aumenta makas kuaze nain 100 resin maka partu iha klinika no inan sira ne’e partu ho normal hotu.
Nia dehan iha klinika sira la aplika prosedimentu teste swab obrigatoriu ba pasiente sira inklui inan sira ne’ebe partu.
“Iha fulan Maio total inan sira ne’ebe mai halo konsulta kuidadu ante natal no partus hamutuk 445, no husi numeru ne’e sira nain 100 maka partu iha ne’e. Numeru ne’e bo’ot kompara ho fulan sira liu ba,” nia hateten.
Nia dehan sira iha kama 6 ne’ebe koloka ba inan sira atu partu tanba ne’e laiha dificuldade konaba espasu, maibe sira menus medikamentu no ekipamentu mediku emergensia nian hanesan daun hodi suku inan sira depois partu.