Domingo, Outubro 17, 2021
Total visitors: 584029

Ministra da Saúde, Doutora Odete Maria Freitas Belo hateten sira dezigna ona fatin izolamentu ida iha Tasi Tolu hodi akumula inan isin rua sira ne’ebe rezultado teste konfirmadu positivu ho Covid-19 atu bele hetan atensaun diak intermaus saúde no nutrisaun.

Ministra da Saúde, Doutora Odete Maria Freitas Belo hateten sira dezigna ona fatin izolamentu ida iha Tasi Tolu hodi akumula inan isin rua sira ne’ebe rezultado teste konfirmadu positivu ho Covid-19.

Nia dehan antes ne’e izolamentu Tasi Tolu akumula pasiente Covid-19 ho grau lizeiru, maibe numeru kazu foun ne’ebe aumenta makas espasu limitadu tanba ne’e propoin kazu sira lizeiru halo izolamentu iha uma.

“Ita tenke buka fatin ba kazu moderadu no grave sira ne’ebe presiza oxygenu. No ba kazu cesariana ita iha fatin ida deit maka izolamentu Vera Cruz tanba izolamentu Lahane mos laiha fatin operasaun,” nia hateten iha Aitarak Laran, Dili.

Nia hateten sira mos halo hela esforsu atu sosas tan ekipamentu sira tau iha fatin izolamentu sira inklui izolamentu Lahane atu apoia atendimentu ba kazu emergensia sira ne’ebe presiza halo operasaun urgente, liu-liu inan isin rua sira.

Iha parte seluk, Diretora Organizasaun Movimentu Feto Foinsa’e Timor-Leste, Yasinta Lujina apresia ho inisiativa governu nian atu indika fatin izolamentu ketak ba inan isin rua sira tanba sira presiza duni atensaun no atendimentu saúde ne’ebe lalais no diak.

Nia dehan esperensia akontese ona kazu balun ne’ebe inan isin rua sira presiza atendimentu ne’ebe lalais, maibe preokupa liu ho Covid-19 entau implika ba vida inan no bebe iha kanotak tanba ne’e ho fatin ne’ebe ketak bele fo atensaun no atendimentu ne’ebe nesesariu ba inan sira.

“Ita hare kondisaun inan sira ne’ebe isin rua ne’e risku laos ba inan deit, maibe ba bebe ne’ebe iha sira nia kanotak. Entau sira presiza duni espasu ida ne’ebe seguru ho tratamentu ne’ebe diak tanba ne’e ami organizasaun ne’ebe servisu ba asuntu direitu feto apresia tebes,” nia hateten.

Iha oportunidade ne’e nia apresia ho esforsu tomak ne’ebe estado halo hodi prevene transmisaun ba ema barak no fornese tratamentu ne’ebe dignu ba sidadaun ne’ebe hetan infesaun, maibe presiza servisu makas liu tan ho apoia ema hotu nian hodi hadia prestasaun servisu saúde ba komunidade.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04