- Publika iha: 08 Setembro 2021
Diretor Executivu Servisu Rejistuno Verifikasaun Empresarial, IP (SERVE), Florêncio da Costa Sanches hateten pursentu 30 husi 35,000 atividade empresarial ne’ebe rejistradu iha sistema nain feto, signifika involvimentu feto iha atividade ekonomia nasional signifikante tebes.
Nia salienta feto nia involvimentu iha atividade komersio informal, ne’ebe seidauk rejistu iha sistema mos bo’ot hanesan sira faan kios, modo no seluk tan.
“Agora dadaun iha programa skema garantia kreditu atu enkoraja feto maluk sira harii kompanha, trata sertifikadu iha SERVE no hetan formasaun iha Institutu Apoia Dezenvolvimentu Empresarial (IADE) molok asesu ba fundu ne’ebe governu tau ona iha banku komersial sira,” nia hateten via telefone.
Nia dehan programa ne’e sei fo prioridade liu atu promove setor produtivu sira hanesan turismu, agrikultura, industria, pekuaria no peskas, ne’ebe feto sira bele involve direitamente.
Nia hateten sira iha akordu servisu ho Asosiasaun Empresarial Mulher Timor-Leste (AEMTL) no tau orsamentu atu implementa programa kapasitasaun ba emprezaria feto sira konaba topiku diferente.
Iha parte seluk, Diretora Kompanha NAUTETU I, II. Lda, emprezaria Maria de Fatima Imaculada Correia da Costa Belo hateten iha tempu beiala sira feto sempre iha hanoin no abilidade atu halo servisu hotu ajuda familia uma laran tanba ne’e importante tenke iha vontade atu halo servisu.
“Atu tama vida empresarial, pesoalmente hau buka hatene hau nia kapasidade atu halo servisu ida ne’e no kapital osan. Maibe kuandu ita iha vontade buat hotu bele lao no hau sempre fiar aan, entau hau hahu laiha kapital no projeitu primeru akordu tenke 50% tanba kontratu iha hau lori ba foti kreditu iha banku hodi implementa,” nia hateten.
Nia dehan hahu tinan 1991, involve ona iha atividade empresarial no hahu ho area konstrusaun, maibe agora halo ona re-investe iha setor seluk hanesan agrikultura, hospitalidade, General supply no negosio ki’ik sira.
Nia rekonhese emprezaria barak hasoru dificuldade konaba manajementu, liu-liu relatorio atividade no orsamentu nian tanba ne’e empreza barak lalao ba oin, maibe agora banku sira mos fornese formasaun sira ba emprezaria sira ne’ebe hetan oportunidade asesu ba fundu ne’ebe governu tau iha banku komersial sira.