Sexta, Janeiro 21, 2022

Presidente Konfederasaun Sindikatu Trabalhador Timor-Leste (KSTL), Almério Vila-Nova Gouveia hateten krime trafiku humanu tantu husi rai laran ba rai liur no husi rai liur mai rai laran akontese barak tanba kampu servisu ne’ebe menus, kondisaun ekonomia no menus konhesementu ba krime ida ne’e.

Presidente Konfederasaun Sindikatu Trabalhador Timor-Leste (KSTL), Almério Vila-Nova Gouveia hateten krime trafiku humanu tantu husi rai laran ba rai liur no husi rai liur mai rai laran akontese barak.

Nia salienta situasaun Timor-Leste ne’ebe menus kampu servisu no kondisaun ekonomia sidadaun nian ne’ebe fraku lori risku bo’ot ba joventude sira atu monu ba oferta oportunidade servisu sira ne’ebe iha intesaun negativu tanba kazu barak ne’ebe deteta ona.

“Trafiku humanu lao hela ita nia rai, maibe informasaun ne’e mak difisil hetan tanba ema tauk hato’o informasaun no sira sente ameasa vida,” nia hateten hafoin partisipa iha seminar nasional impaktu HIV ba mundu trabalho iha salaun Madre Canosiana Becora, Dili.

Nia dehan kazu migrante internal, joven barak desloka husi munisipiu orijin mai serivsu iha Dili hetan explorasaun, servisu lahetan pagamentu no seluk tan. Kazu migrante external kompanha balun rekruta timor oan ba servisu iha rai liur, maibe ikus mai servisu la tuir prormesa ne’ebe halo no laiha kontratu, nune’e mos iha kazu ema estranjeiru ne’ebe rekruta mai servisu iha rai laran.

Nia hateten iha tinan rua liu ba, sira simu keixa husi trabalhador estranjeiru ida husi nasaun Indonesia, kompanha Indonesia nian ida halo exportasaun ba kafe rekruta trabalhador ne’e mai servisu iha timor ho promesa salario, akomodasaun, maibe realiade servisu fulan hitu lahetan pagamentu salario.

Nia hatutan kazu ne’e sira konsege rezolve husu kompanha halo pagamentu salariu durante fulan hitu, ativa pasaporte ne’ebe canceladu no responsabiliza orsamentu hodi transporta trabalhador ne’e fila ba Indonesia.

Iha parte seluk, Xefe Departamentu Investigasaun Kriminal Servisu Imigrasaun, Primeru Sarjentu Alfredo Abel hateten krime trafiku humanu ne’e krime organizadu, ne’ebe difisil atu deteta tanba ne’e sosiedade kuidadu ho oferta oportunidade servisu sira, liu-liu iha rai liur.

Nia dehan kondisaun ekonomia no menus konhesementu halo ema barak ona sai vitima ba trafiku humanu hanesan iha 2018, kompanha ida servisu hamutuk ho timor oan balun rekruta feto timor nain 32 atu ba servisu iha China, no to’o iha ne’eba servisu servisu ne’ebe sira halao la tuir kontratu no lahetan salariu tanba ne’e iha fulan Dezembru tinan 2018, governu China deporta sira fila mai.

“Antes imi ba servisu ho kompanha ruma iha fatin rua tenke hare didiak informasaun sira ho klaru keta halo ba sai vitima fali iha ne’eba. Tanba ne’e tenke hare vaga ne’e espesialidade, kompanha ne’e iha koperasaun ho governu, akontese buat ruam kontaktu ba se importante. No bainhira imi sai fo hela numeru kontaktu, hela fatin, kompanha naran ba familia ruma atu imi hasoru problema ba polisia imigrasaun ou embaixada ami bele buka informasaun no fasil ami halo kontaktu,” nia hateten.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04