Sexta, Janeiro 21, 2022

Diretur Jeral, iha Ministerio Solidaridade Sosial no Inkluzaun, Rui Exposto hateten hahu tinan 2022, bazea ba dekretu lei Nᵒ 22/2021 de 10 de Novembru, governu implementa programa foun ho naran bolsa da mãe jerasaun foun, ne’ebe alvu konsentra ba inan isin rua no bebe sira ne’ebe moris husi idade 0 ate loron 1,000.

Diretur Jeral, iha Ministerio Solidaridade Sosial no Inkluzaun, Rui Exposto hateten hahu tinan 2022, bazea ba dekretu lei Nᵒ 22/2021 de 10 de Novembru, governu implementa programa foun ho naran bolsa da mãe jerasaun foun.

Nia dehan apoia sosial ba inan isin rua no bebe sira ne’e atu hasa’e kapasidade familia nian atu bele asesu ba ai-han sira ne’ebe nutritivu no atendimentu kuidadu saúde hodi kontribui ba hadia saúde no nutrisaun inan no oan nian.

“Tinan 2022, ministerio solidaridade sosial no inkluzaun hamutuk ho ministerio da saúde sei implementa programa bolsa da mãe jerasaun foun, ne’ebe sei konsentra ba inan isin rua no mos labarik sira ne’ebe moris husi idade 0 ate mil dias,” nia hateten iha Delta Nova, Dili.

Nia hateten bebe sira ne’ebe moris mai ho kondisaun defisiente sei hetan osan adisional tanba sira iha nesesidade espesifiku.

Nia informa programa ne’e sei hahu pilotu iha munisipiu tolu mak Ainaro, Bobonaro no Rejiaun Administrativa Espesial Oecusse Ambeno (RAEOA) iha tinan 2022, no sei extende tan ba munisipiu seluk iha teritorio nasional iha tinan tolu oin mai.

Tuir dekretu lei No 22/2021 de 10 de Novembru, kriasaun subsidio ba inan isin rua no labarik, designadu ba subsidiu Bolsa da Mãe-Nova Jerasaun, seksaun II konaba determinasaun montante subsidiu iha artigu 11 konaba montante subsidiu defini katak valor fiksu ba inan isin rua sira mak $15 kada fulan no ba labarik sira ho valor $20 kada fulan.

Iha parte seluk, Diretora Executiva Organizasaun Movimentu Feto Foinsa’e Timor-Leste (MOFFE-TL), Yasinta Lujina hateten apresia ho programa governu nian atu fo subsidiu ba inan isin rua sira no labarik sira, maibe importante kria sistema dadus ne’ebe organizadu no mekanismu ne’ebe diak atu programa ne’e benefisia duni ba grupo alvu sira hodi kontribui mos ba problema sosial sira ne’ebe akontese iha rai laran.

Nia dehan programa ne’e sei motiva inan isin rua sira atu visita fasilidade saúde sira hodi hetan atendimentu kuidadu saúde ne’ebe diak durante isin rua no partu iha fasilidade saúde.

“Ne’e hau hanoin mekanismu ida bele ajuda dudu ita nia maluk feto sira iha area rural no munisipal ho efetivu utiliza fasilidade saúde sira ne’ebe iha no ita bele hamenus numeru mortalidade inan no oan,” nia hateten.

Nia hateten governu mos presiza halo edukasaun no sensibilizasaun diak liu tan ba komunidade sira, liu-liu joven sira atu evita numeru taxa isin rua sedu aumenta makas liga ho implementasaun subsidiu ida ne’e.

Bazea ba rezultado monitorizasaun ne’ebe sira halao iha munsipiu sira konaba implementasaun subsidiu bolsa da mãe, ne’ebe implementa ona desde tinan 2008. Nia rekomenda ba governu atu hadia sistema dadus no kria mekanismu pagamentu ne’ebe efetivu atu subsidiu ne’e ba duni ema ne’ebe merese.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04