- Publika iha: 23 Maio 2022
Iha ambitu selebrasaun loron restourasaun independensia Timor-Leste ba dala XX (rua nulu), Presidente Republika periodu 2022-2027, José Ramos Horta deklara komitmentu promove igualidade jeneru, liu-liu asegura feto nia posisaun foti desizaun iha gabinete presidensial.
“Iha presidensial departamentu ida xefi mane nia sub-xefi tenke feto ou xefi feto mane sai sub-xefi, laiha esplikasaun no laiha diskulpa tenke nune’e,” nia hateten iha diskursu selebrasaun loron restourasaun independensia ba dala XX, iha Presidensial Aitarak Laran, Dili.
Nia dehan komunidade ho defisensia no LGBTI mos iha fatin atu involve iha presidensial periodu 2022-2027, tanba sira Timorense no iha kapasidade diak liu ema seluk.
“Ba sira ne’ebe ita dehan defisensia, xefi departamentu ba sosiedade sivil ita nia alin ida konhesidu iha Timor. Ita hotu konhese nia iha problema ho hare, maibe nia laiha problema ho kakutak nia kakutak diak liu ema lubun ida ne’ebe matan diak hela,” nia hatutan.
Nia hateten sei konsulta ho lider nasional Xanan Gusmão, Taur Matan Ruak, Lu-Olo ho sira nia esposa atu kontinua programa sosial presidensial nian.
Nia informa presidensial Aitarak laran nakloke ba ema hotu, no sei tau rede internet iha jardin atu fasilita labarik, joven sira bele asesu no halimar iha laran.
Iha parte seluk, Aktivista no Politiku Feto, Milena Pires hateten komitmentu Presidente Republika, José Ramos Horta ne’e importante tebes no fiar presidente sei halo esforsu tomak atu kumpri komprimisiu ida ne’e hodi asegura paridade entre feto no mane iha setor hotu.
“Husi prespetiva igualidade jeneru hau hanoin katak presidente nia komitmentu atu asegura paridade iha rekrutamentu ba nia gabinete 50% feto no 50% mane, ne’e hau hanoin katak importante loos no hau fair presidente sei halo esforsu tomak atu kumpri ida ne’e,” nia hateten.
Nia espera Xefi Governu, Parlamentu Nasional no institusaun hotu iha estadu ida ne’e sei tuir mos exemplu diak ne’ebe Presidente Republika hahu dadaun ona iha gabinete laran.