- Publika iha: 24 Janeiro 2023
Reprezentante United Nations Population Fund (UNFPA), iha Timor-Leste, Pressia Arifín-Cabo hateten sira iha komitmentu mobiliza rekursu atu estabelese Sentru Kuidadus Emerjénsia Obstetriku no Neonatal (KEmON) iha rai-laran hodi salva inan isin-rua 6000 ne’ebé iha komplikasaun.
Nia salienta dadus nasionál husi ministériu saúde, kada tinan inan isin-rua iha Timor-Lete hamutuk 40,000 no husi númeru ne’e na’in 6000 mak risku ba mate tanba komplikasaun sira, entaun importante tebes atu iha fasilidade ida hodi fó atendimentu ne’ebé apropriadu salva inan sira-ne’e nia moris.
“Ida-ne’e úniku infraestrutura atu responde ba kuidadu emerjénsia, entaun importante tebes atu estabelese sentru ida-ne’e. UNFPA estabelese ona tolu, ami presiza estabelese tan 22,” nia hateten hafoin akompaña embaixadór Japaun iha Timor-Leste, Kimura Tetsuya halo vizita ba Sentru Kuidadus Emerjénsia Obstetriku no Neonatal-Báziku (KEmON-B) iha Munisípiu Liquiçá.
Nia dehan tempu badak sei halo tan lansamentu ba sentru rua mak iha munisípiu Ataúro tanba presiza oras 2 transporta inan isin-rua sira mai Hospital Nacional Guido Valadares, Díli no iha tempu kalan labele halo transferensia, no ida seluk ha munisípiu Ermera.
Nia hateten sira lahalo konstrusaun foun, maibé halo reabilitasaun ba fasilidade ne’ebé iha ona no apoia ekipamentu non-médiku no médiku nian inklui fó formasaun ba profesionál saúde sira atu fó atendimentu ne’ebé kualidade ba inan sira partu ho komplikasaun.
Nia haktuir ba 22 sentru ne’e presiza kustu millaun $4.5 dolar amerikanu tanba ne’e importante ba sira atu aprosima nasaun seluk ne’ebé hakarak ajuda harii sentru ne’e barak liutan iha Timor-Leste hodi salva inan sira.
Iha parte seluk, Embaxadór Japaun, iha Timor-Leste, Kimura Tetsuya hateten kooperasaun governu Japaun no Timor-Leste iha setór oioin inklui setór saúde, liu-liu saúde inan no oan sai mós prioridade ida ba sira.
“Saúde maternál ne’e ami-nia prioridade. Iha loron hira liuba ha’u halo diskusaun ho reprezentativu UNFPA nian informa sira suporta sentru sira hanesan ne’e no sira husu ami atu suporta, entaun ha’u mai iha ne’e atu haree ho matan oinsá funsionamentu sentru ne’e no ha’u sei husu governu Tokyo atu suporta estabelese sentru ne’e iha Timor-Leste tanba ha’u haree importante tebes,” nia hateten.
Embaxadór mós hato’o apresiasaun ba profesionál saúde sira ne’ebé fó dedikasaun tomak asegura funsionamentu sentru sira-ne’e hodi atendimentu ba inan isin-rua sira.