- Publika iha: 21 Agosto 2023
Sekretária Estadu Igualdade (SEI), Elvina de Sousa Carvalho husu feto potensiál sira iha nivel suku labele dezafia aan ho deklarasaun diskriminativu sira ne’ebé mosu iha públiku, tenke brani hola desizaun kandidata aan kompete ho parseru mane sira iha eleisaun suku, ne’ebé sei monu iha loron 28 fulan Outubru tinan 2023.
Nia dehan SEI no movimentu organizasaun feto sira, sei halo esforsu tomak atu prepara feto potensial sira no akompaña sira iha prosesu aprezentasaun kandidatura, eleisaun to’o rezultadu eleisaun.
“SEI kondena makas deklarasaun sira ne’ebé ho tipu diskriminativu ho intensaun diskrimina no limita direitu ema ida nian, liu-liu direitu feto tanba kontra espíritu konstitusaun RDTL nian, iha artigu 16 no 17.
“Kultura sira hanesan ne’e eziji ita atu servisu makas hodi halakon no hamenus intrepretasaun sira ne’ebé ladi’ak ho objeitvu disrimina no esklui feto iha prosesu tomak. feto hotu iha direitu atu asesu no partisipa iha setór hotu,” nia hateten iha Timor Plaza, Díli.
Nia apelu ba administradór munisipíu no postu sira atu promove polítika governu nian ba promosaun iguldade no inkluzaun, liu-liu enkoraja feto, portadór defisiénsia no komunidade LGBTIQ partisipa iha setór hotu inklui kandidata aan iha xefe suku no xefe aldeia.
Entretantu, Sekretáriu Munisípiu Manatuto, Eduardo Guterres hateten atividade sosializasaun kona-ba eleisaun suku lao hela iha nivel postu no suku sira atu enkoraja sidadaun sira ne’ebé elejivel tantu feto no mane atu hola parte, liu-liu kompete iha eleisaun tinan 2023.
Nia dehan iha munisípiu Manatuto, xefe suku feto na’in-tolu husi suku 31 no iha administradór postu feto ida mak postu Manatuto Villa. No iha posibilidade númeru ne’e aumenta iha eleisaun suku tinan 2023.
“Depois ita haree sira-nain tolu ne’e nia servisu, ita haree katak feto bele. Ne’ebé feto sira lalika dezafia aan katak labele, imi labele preokupa makas, tanba ami haree tiha ona feto lidera suku até postu laiha diferensia ho mane,” nia hateten.
Nia enkoraja feto potensiál sira iha Munisípiu Manatuto atu lalika dúvida no rona deklarasaun sira ne’ebé diskriminativu iha sosiedade, importante kapasita aan avansa ba oin tanba feto bele halo mudansa.
Iha parte seluk, Ministru Administrasaun Estatal, Tomas Cabral, Konsellu Ministru aprova ona dekretu governu kona-ba kalendáriu eleisaun suku, ne’ebé sei monu iha dia 28 fulan Outubru, tanba ne’e prosesu enkontru konsellu suku hahú iha dia 13 fulan Outubru.
Nia enkoraja sidadaun hotu-hotu ne’ebé iha idade 17 ba leten tantu feto no mane atu partisipa iha eleisaun suku hanesan eleitor no kandidatura.
“Kriteria mak populasaun 1% tenke apoia kandidatura ida bele aprezenta nia kandidatura,” nia hateten.