- Publika iha: 02 Outubro 2023
Komandate Polísia Munisípiu Manufahi, Superintendente Joni Viana, dehan durante fulan hitu (7) hahu husi janeiru to'o agustu ne'e submete ona kazu violénsia doméstika (VD) hamutuk 15 ba Ministériu Públiku (MP) hodi prosesu ba tribunal.
Nia dehan, kazu violénsia doméstika 15 ne’ebé rejistu ne'e ho tipu violénsia integridade fizika simples no grave, nune’e kazu aas liu ne'e mak simples, hamutuk 9 seluk grave.
"Kazu violénsia doméstika 15 ne'e ita aprezenta ba Ministériu Públiku hodi haree nia andamentu ba kazu hirak ne'e atu nune'e autór sira bele kumpri [kastigu] ba hahalok krime ne’ebé sira halo," nia dehan.
Nia dehan, kazu violénsia doméstika ne'e prosesu tuir lei, tanba ne'e krime públiku. Ne'e kazu hotu tenke prosesu tuir dalan legál no la autoriza rezolve tuir dalan kulturál.
"Kona-ba ita-nia vítima sira dadaun ne'e ita entrega hela ba uma mahon hodi hetan protesaun ba sira-nia mentalidade," Komandante Viana dehan.
Enkuantu nia dehan, kauza ba kazu violénsia doméstika hirak ne'e tanba problema ekonomia uma laran.
Iha parte seluk, Prezidente Board Rede Feto Timor-Leste, Yasinta Lujina hatete, durante ne'e sira esforsu makas halo advokasia no kampaña ba prevensaun violénsia doméstika no violénsia bazea ba jéneru rezultadu di’ak oituan, tanba ema barak konsiente violénsia ne’e la di’ak, la aseitável, maibé presiza nafatin servisu makas liutan ba prevensaun no asisténsia ba vítima sira.
"Iha munisípiu hotu ne’ebé ita hala'o servisu ba ne'e, munisípiu Manufahi mak hahu redús ona rejistu kazu violénsia doméstika ne'e rasik, tanba ne'e husu atu kontinua redús iha futuru," nia saliente.
Nia dehan, munisípiu Manufahi sai ezemplu ba munisípiu sira seluk atu bele lao tuir no Rede Feto Timor-Leste nafatin esforsu an halo kampaña hodi hapara violénsia hasoru feto no labarik feto iha teritóriu laran.