Segunda, Junho 24, 2024
Total visitors: 766366

Durante fulan tolu jeneiru to’o marsu tinan 2024 FOKUPERS (Forum Komunikasaunba Feto Timor-Leste) fó ona asisténsia ba vítima husi kazu sira inklui violénsia domestika, violénsia bazeia ba jéneru, violénsia fiziku, no abandona hamutuk na’in 40 iha uma mahon ba ema adultu (tinan bo’ot).

Durante fulan tolu  FOKUPERS fó ona asisténsia ba vítima husi kazu sira hamutuk na’in 40 iha uma mahon ba ema adultu (tinan bo’ot).

Diretora Ezekutiva FOKUPERS, Maria Fatima Pereira dehan vítima sira ne’ebé sira fó asisténsia integra iha uma mahon husi kazu violénsia fiziku ne’e mak aas kada fulan hahu husi 19 to’o 25.

“Durante fulan janeiru to’o marsu ne’e ita fó asisténsia ba vítima hamutuk 40 iha uma mahon husi kazu sira ne’e, ita aprezenta ona ba polísia hamutuk 22, no iha Ministériu Públiku hamutuk 12,” nia dehan.

Diretora hatutan, kazu sira ne’ebé aprezenta ba polísia no Ministériu Públiku ne’e, tanba kategoria ona krime, sira ne’ebé la kategoria krime FOKUPERS hamutuk ho rede referal sira halo mediasaun de’it.

“Ita halo mediasaun, ita nafatin fó asisténsia no halo rekoperasaun ba sira-nia mentalidade, bainhira sira rekopera ona sira-nia mentalidade, sira bele fila ona ba sira-nia familia hodi halo atividade hanesan bai-bain,” nia dehan.

Nia dehan, dadaun ne’e iha uma mahon adultu iha vítima na’in 22 mak nafatin hetan asisténsia husi FOKUPERS.

Iha parte seluk Komandante Polísia Munisípiu Díli Superientendente Xefe Orlando Gomes dehan, vítima ne’ebé aprezenta husi organizasaun feto hanesan FOKUPERS hamutuk 22 ne’e, polísia rejistu ona sira-nia kazu.

“Kazu ita rejistu ona, dadaun ne’e ita hein hela vítima sira atu mai hato’o deklarasaun maibé sira seidauk rekupera sira-nia mentalidade nune’e bele mai hato’o deklarasaun ba polísia hodi halo prosesu ba sira-nia kazu,” nia dehan.

Nia dehan, polísia hein de’it aprezentasaun husi vítima sira, maske ne’e krime maibé vítima balun hakarak prosesu tuir dalan legal balun hakarak rezolve husi dalan kultural ida ne’e desizaun husi vítima, tanba lei fó dalan.