Belaniza: Labele Baruk Aprende Tanba Feto Mós Bele Sai Lideransa

Belaniza Ximenes da Costa nu’udar graduada husi Departamento de Agronomia, Faculdade de Agricultura, Universidade Nacional Timor Lorosa’e (UNTL) dehan, nu’udar feto labele baruk aprende, tanba feto mós presiza aprende hodi sai lideransa.

Nia hateten, feto labele baruk atu aprende no la depende liuba ema seluk, maibé tenki fiar aan atu bele hetan oportunidade di’ak liu iha kareira.

“Ha’u senti ita joven presiza atu hetan futuru ne’ebé mak di’ak liu, liuliu ita feto, ita labele atu depende liuba ema ba ema seluk de’it, ita presiza sai ita-nia aan rasik no bele hetan oportunidade ne’ebé di’ak liu iha kareira, tanba agora ha’u mós servisu iha Banco Mandiri.

Ita mós labele baruk atu aprende tanba ita feto mós presiza sai lideransa, labele depende de’it ba ema seluk tanba ita feto mós bele,” nia hateten bainhira simu graduasaun husi UNTL, iha Jináziu GMT, Díli.

Nia deklara, nia bele hetan susesu tanba suporta másimu husi nia família no nia orgullu ho buat ne’ebé nia atinji nu’udar graduadu mellor iha área Agronomia.

“Agradese tanba ha’u mak sai mellór graduanda iha ha’u-nia fakuldade ho valór 3,42, primeira-vez buat ne’ebé motiva liu ha’u to’o faze ida agora bele hetan valor ne’ebé mak kapás bele gradua, ne’e tanba ha’u-nia família, ne’ebé mak suporta ha’u ho másimu.

Ha’u senti orgullu, tanba ho ha’u-nia aan rasik ha’u bele la’oto’o iha faze ida ne’e, hosi loron primeiru tama iha UNTL no ikus mai bele gradua ho valór ne’ebé di’ak,” dehan Belaniza iha salaun GMT.

Iha fatin hanesan, Pedro Barbosa nu’udar inan-aman dehan, fetoTimor iha ona progresu ne’ebé di’ak hodi kontribui ba dezenvolvimentu.

“Kapas tebes, tanba agora ne’e feto iha Timor-Leste ninia inteletuál, komesa aas dadaun ona, ita haree husi kuantidade ne’e iha graduasaun ida ne’e feto barak liu mane, entaun ne’e espetativa ba future ne’e katak feto sei iha progresu di’ak, feto sei asesu ba lideransa liuliu buat ne’ebé liga ba dezenvolvimentu,” nia hakotu.

Diretór Diresaun Nasionál Atendimentu Estudante (DNAE)-UNTL Rui Loco Pires hateten, bazeia ba lista graduasaun iha semestre I tinan akadémika 2024 nian, hatudu katak feto ho númeru 935 no mane hamutuk 780.

“Haree husi lista graduasaun nian hamutuk 1715 no distribui ba jéneru hatudu katak feto hamutuk 935 reprezenta 54,5% no mane hamutuk 780 reprezenta 45,5%. Ne’e hatudu katak feto iha kuantidade di’ak no partisipa iha edukasaun kompara ho mane,” dehan Diretór DNAE Pires.