Komunidade Nia Uma Ruanulu Resin Lima Hetan Estragus Husi Dezastre Naturais

Durante semana ida hahú husi loron ualu (08) to’o loron sanulu resin lima (15) fulan Julli akontese dezastre naturais iha munisípiu sanulu resin tolu (13) afeta ba komunidade nia uma hamutuk ruanulu lima (25) mak hetan estragus.

Autoridade Protesaun Sivíl liuhusi Gabineti Relasaun Externa no Komunikasaun nia Porta-voz Nelson Nunes hateten, durante semana ida iha munisípiu 13 uma 20 mak hetan estragus husi dezastre naturais.

“Munisípiu sira ne’ebé mak hetan estragus ba dezastre naturais ne’e mak hanesan Munisípiu Aileu anin sobu komunidade nia uma ida, Bobonaro anin sobu komunidade nia uma rua, Baucau anin sobu uma haat, Ermera rai halai estraga komunidade nia uma lima no anin sobu komunidade nia uma ida.

Iha Manatuto anin sobu komunidade nia uma rua no rai halai estraga komunidade nia uma ida, Likisa anin sobu komunidade nia uma tolu, Oe-Cusse anin sobu komunidade nia uma ida, Viqueque anin sobu komunidade lima,” nia dehan liuhusi komunikadu imprensa, iha salaun APC, Kaikoli, Díli.

Nia esplika, bain hira dezastre ne’e akontese vítima sira ne’e afeta ba dezastre naturais ne’e, vítima sira hetan kedas ajuda komunitáriu hanesan sasán bázika sira ne’e husi Autoridade Pretesaun Sivíl.

Nia hatutan, ba komunidade sira ne’ebé uma hetan estragu totál ne’e APC nafatin foti dadus hodi hare didi'ak atu nune’e bele fó ajuda sasán konstrusaun ba komunidade sira ne’e.

Iha Parte seluk, Xefe Suku Bahalarawauin Angelo Pinto hateten, komunidade sira iha ne’e bainhira tempu udan ne’e sempre hetan dezastre naturais, maibé autoridade protesaun sivíl sira mai hare no foti ona dadus no fó ona sasán báziku sira maibé sasán konstrusaun ne’e seidauk.

“Sira husi APC mai hare no foti ona dadus ba komunidade sira ne’e afeta ba dezastre naturais, hodi fó ona sasán bázika sira sira hanesan foos, mina, masako, masin, sabaun, rinso no seluk tan, ida ne’e sira fó ona, maibé ba komunidade sira ne’ebé hetan estragus totál ba sira nia hela fatin ne’e to’o agora sira seidauk fó sasán konstrusaun ruma, hanesan kaleen, besi pregu, sira ne’e seidauk, maibé sira mai ne’e rejistu hotu ona,” nia hateten.

Nia hatutan, autoridade protesaun sivíl sira kada loron, sempre simu dadus husi dezastre naturais no sira mai halo de'it rejistu no fó de'it sasán báziku sira ne’e, maibé sasán konstrusaun ba uma sira ne’ebé hetan estragus totál ne’e to’o agora seidauk fó, sira dehan hein de'it maibé to’o agora.