- Publika iha: 15 Outubro 2024
Vise-Ministra Solidaridade Sosial e Inkluzaun (MSSI), Céu Brites hateten MSSI sei fó ajuda matéria prima no aihan ba ema defisiénsia na'in-lima (5) iha Munisípiu Manatuto, Postu Administrativu Manatuto, Suku Cribas, Aldeia Athoc.
Nia dehan, governu liuhusi Ministériu da Solidaridade Social e Inclusão (MSSI) halo vizita ba haree diretamente kondisaun ema ho defisiénsia sira iha Aldeia Athoc, atu nune’e bele ajuda netik sira ho sasan no aihan ruma ba sira.
"Sidadaun na'in-5 ne'ebé hela iha Munisípiu Manatuto, Postu Administrativu Manatuto, Suku Cribas, Aldeia Athoc sira-ne'e hela ho kondisaun defisiénsia, ita haree rasik sira-nia kondisaun.Alin ne’e tuur iha kadeira, maibé susar atu ba-mai, tanba ho kondisaun defisiénsia," hatete Vise-Ministra Ministériu MSSI.
Nia dehan,MSSI servisu hamutuk ho Sentru Reaabilitasaun Bekora hodi bele haree diretamente maluk sira ho kondisaun defisiénsia, atu ajuda oinsá bele halo tratamentu ba sira-nia saúde.
"Ita mai haree direita, depois ita ba koordena ho Sentru Reaabilitasaun Nasional sei mai haree, no halo diagnóstiku ba sira depois ekipamentu saida maka sira presiza, tanba kadeira ne'ebé durante ne’e uza la konfortável nia atu tuur, depois ita sei haree nia uma, tanba kondisaun uma ne'ebé ladún di'ak ba nia, ita sei hadia sira-nia uma," nia esplika.
Iha fatin hanesan, Delegadu Suku Caribas Aldeia Athoc, Carlos Alves Soares informa, Vise-Ministra MSSI halo vizita ba defisiénsia sira ida-idak, ne'e oportunidade di'ak ba sira, tanba mai haree diretamente kondisaun reál ne'ebé sira hasoru.
"Ita haree maluk defisiénsia na'in hirak ne'e ho kondisaun ne'ebé kbiit-laek duni, kona-ba materiál nomós uma, kondisaun uma ne'ebé la sai atu uza hodi moris loroloron, tanba ne'e ha'u hanoin prezensa Vise-Ministru MSSI ne'e importante ba sira," nia esplika.
Nia esplika, defisiénsia na'in-lima ne’e hanesan, Eduardo Sina Xavier, Agostinho Soares, Difisensia Vicente Soares, nomós defisiente Matan Carolina Soares, inklui mós labarik ho naran Forsaina dos Reis Alves ne'ebé ho idade tinan rua labele la'o ba mai, tanba ain ho Liman labele book an.