- Publika iha: 15 Outubro 2024
Parlamentu Nasionál husu Autoridade Inspesaun Fiskalizasaun Ekonomia no Sanitária Alimentár (AIFAESA) tenke sériu hodi kontrolu sasán ne’ebé liu prazu ona, maibé sei kontinua faan iha loja no supermerkadu sira.
Deputadu Duarte Nunes dehan, AIFAESA tenke halo servisu ho sériu hodi halo kontrolu másimu ba sasán liu prazu iha estabelesimentu komersiál sira.
Nia dehan, presiza haree sasán sira ne’ebé importa mai Timor-Leste, atu bele garante hahan ne’ebé di’ak no la liu prazu ba konsumidor sira, nune'e bainhira sira konsumu labele iha impaktu ba sira-nia saúde.
"Husu ba AIFAESA tenke halo servisu ho sériu hodi kontrolu sasán liu prazu, atu nune'e labele fo impaktu ba konsumidór nia saúde," Deputadu Nunes dehan iha Parlamentu Nasionál, Díli.
Alende ne'e nia dehan, laloos ba ai-han de’it, maibé ba mós ai-moruk sira ne’ebé mak liu prazu ona, tenke rekolla no hodi ba halo distruisaun ona labele fó nafatin ba pasiente sira utiliza, tanba ne'e perigu ba ema nia vida.
"Ita haree ba preokupasaun husi konsumidór sira kona-ba sasán liu prazu, ita komunika ho parte relevante sira atu halo servisu ho sériu hodi bele solusiona," nia informa.
Alende ne'e nia mós rekomenda ba AIFAESA, atu iha futuru tenke iha rasik laboratóriu atu bele halo teste ba ai-han no ai-moruk sira ne’ebé liu ona prazu.
Entretantu Diretór Ezekutivu AIFAESA Ernesto Monteiro dehan, halo ona komunikasaun ho Asosiasaun Emprezarial rai-laran no estranjeiru sira atu kumpri lei sira ne’ebé regula atividade ekonomia.
"Ita husu sira atu labele faan sasán ne’ebé mak liu prazu no faan sasán tuir lei ne’ebé mak regula atu konsumidór sira labele sai vítima ba hahan liu prazu," nia dehan.
Nia dehan, durante ne'e AIFAESA hala'o nia servisu tuir lei no konsege rekolla sasán ne’ebé mak liu prazu hodi ba halo distruisaun nune'e mós aplika sansaun ba emprezária sira.
"Ba oin ita sei sériu liutan halo servisu kontrolu hodi haree sasán sira ne’ebé liu prazu hodi halo aprensaun, no aplika sansaun," Diretór Ezekutivu AIFAESA Monteiro dehan.
Enkauntu nia dehan, totál Asosiasaun Emprezarial Xinesa iha Timor-Leste hamutuk 500 resin no Timoroan hamutuk rihun 15, no durante ne'e liuhusi sansaun ne’ebé sira aplika, no konsege kontribui ona reseitas ba kofre estadu hamutuk $ 638.670.