Uma-Kain 667 Seidauk Hetan Apoiu Rekuperasaun

Vítima ba dezastre naturais ho uma-kain hamutuk atus-neen, neenulu resin hitu (667) iha territóriu laran tomak mak seidauk hetan apoiu rekuperasaun ba sira-nia hela fatin.

Sekretáriu Estadu Protesaun Sivíl (SEPS) Mariano Reis hatete, família uma-kain 667 ne'e afetadu ba dezastre naturais hahú husi tinan 2022 mai to'o ohin loron no durante ne'e seidauk hetan apoiu rekuperasaun ba sira-nia hela fatin.

"Uma-kain 667 identifikadu ona tama iha estragus total no governu iha kompeténsia tomak tuir lei ne’ebé iha hodi halo apoiu rekuperasaun, maibé ita seidauk halo rekuperasaun ba sira-nia hela fatin, tanba kestaun orsamentu," nia informa.

Maibé nia dehan, kona-ba apoiu emerjénsia governu halo ona, rekuperasaun mak seidauk, maibé dadaun ne'e governu halo hela esforsu hodi konstrui hela fatin ba vítima uma-kain hirak ne’e.

"Ita prepara ona materiál konstrusaun sira, no orsamentu mão de obra hodi bele apoiu no distribui ba vítima sira hodi konstrui fali sira-nia hela fatin ne’ebé mak dignu," SEPS Reis dehan.

Nia dehan, vítima uma-kain 667 ne'e, ekipa identifika ona katak sira livre husi área risku, tanba ne’e governu tenke apoiu konstrusaun ba sira-nia uma, maibé kuandu iha área risku sei la apoiu rekuperasaun.

Enkuantu nia dehan, totál vítima afetadu ba dezastre naturais ne’ebé sira rejistu hamutuk 4562 ne'e hela hotu ona apoiu emerjénsia falta apoiu rekuperasaun ba uma-kain 667.

Entretantu vítima afetadu Agusto Lopes dehan, nia uma hetan estragus totál iha tinan 2023, tanba ai-monu hanehan uma, maibé to'o agora seidauk hetan apoiu husi Governu hodi konstrusaun foun.

"Kona-ba apoiu emerjénsia iha momentu ne'e ami hetan ona, depois ekipa ida mai foti ona dadu hodi apoiu materiál konstrusaun, maibé to'o ohin loron seidauk," nia informa.

Tanba ne'e nia husu ba governu liu-liu Sekretáriu Estadu Protesaun Sivíl (SEPS) atu bele aselera lalais apoiu konstrusaun, tanba dadaun ne'e sira hela de’it iha lona okos.