PNTL-Parseiru Realiza Kompaña Ba Prevensaun Violénsia Kontra Feto no Labarik-feto

Polísia Nasionál Timor-Leste (PNTL) ho parseiru UN Women, Sekretáriu Estadu Igualdade (SEI) ho Timor-Leste Police Development Programme (TLPDP) realiza kompaña prevensaun Violénsia Kontra Feto no Labarik-Feto iha Timor-Leste hodi komemora loron 16 ativismu kontra violénsia.

Komandante Jerál Polísia Nasionál Timor-Leste (PNTL) Komisáriu Henrique da Costa dehan, kazu violénsia hasoru feto no labarik-feto ne'e rejistu a'ás tebes tiha Timor-Leste, tanba ne’e PNTL realiza kompaña ne'e ho esperansa atu bele redus númeru violénsia bazeia jéneru.

Nia dehan, tuir dadus ne’ebé iha kazu violénsia kontra feto no labarik-feto ne’ebé iha tinan 2024 hamutuk1158,

“Tipu violénsia husi total 1158 ne’e fahe ba ofensa integridade fizika simples, maustratos, maustratos ba menor, relasaun seksuál, abuzu seksuál ba menor, no violénsia doméstika iha 250.

Liga ba númeru kazu ne'ebé mak bo'ot tebes, tanba ne'e Komandu Polísia Nasionál Timor-Leste (PNTL) realiza kompaña ba prevensaun Violénsia Kontra Feto no Labarik-feto hodi komemora loron 16 Aktivismu kontra violénsia iha Timor-Leste," nia informa.

Nia dehan, atividade kampaña ida ne'e atu redús krime kontra feto no labarik-feto ne'ebé mak rejistu aás iha Timor-Leste.

Entretantu Sekretáriu Estadu Igualdade Interino Expedito Dias Ximenes dehan, governu liuhusi Sekretáriu Estadu Igualdade servísu hamutuk ho Polísia Nasionál Timor-Leste (PNTL) realiza kompaña violénsia kontra feto no labarik-feto.

"Ita haree dadus violénsia kontra feto no labarik-feto ne'e aás tebes, tanba ne'e governu hamutuk ho PNTL halo kampaña ida-ne'e oinsa atu minimiza," nia dehan.

Nia hatete, governu sente orgullu tebes, tanba bele servísu hamutuk ho PNTL tanba sira-nia prezensa iha munisípiu hotu to'o baze.

Nia informa, PNTL durante ne'e apoiu tomak governu oinsa atu bele reduz violénsia hasoru feto no labarik feto iha Timor-Leste.

Iha parte seluk Reprezentante UN Women Timor-Leste Nishtha Satyam dehan, Polísia Nasionál Timor-Leste (PNTL) knaar hodi prevene violénsia hirak ne'e sei kontribui ho signifikativu, hodi hakotu bareíra sira ne’ebé satan netik feto sira-nia partisipasaun iha lideransa no prosesu foti desizaun.

"Aparesia ba PNTL tanba kria programa kampaña hodi komera loron 16 ativismu kontra violénsia hasoru feto no labarik-feto iha Timor-Leste, ba implementasaun balun planu estratejia jéneru nian," nia dehan.

Nia hatene, agradese tebes, tanba PNTL liuhusi Gabinete Igualidade Jéneru bele fó konfiansa ona ba UN Women nune’e bele apoiu, hodi selebra kampaña loron 16 ativismu kontra violénsia iha Timor-Leste.