Quarta, Fevereiro 19, 2025

Parlamentu Nasionál husu Arkivu Muzeum Rezisténsia Timorense (AMRT) atu sériu hala'o nian servisu hodi konserva fatin abrigu istóriku sira iha Timor-Leste.

Parlamentu Nasionál husu Arkivu Muzeum Rezisténsia Timorense (AMRT) atu sériu hala'o nian servisu hodi konserva fatin abrigu istóriku sira iha Timor-Leste.

Deputada Cedelízia Farria do Santos hatete, fatin abrigu istóriku sira ne'e tenke halo konservasaun, nune'e bele sai fatin turizmu hodi bele kontribui mós reseitas ba iha munisípiu sira ne’ebé pertense ba.

Nia dehan, presiza mós koordena ho Sekretáriu Estadu Arte no Kultura (SEAK) hodi haree mós asuntu ne'e, tanba abrigu istóriku barak mak abandona no seidauk halo prevensaun.

"Ita husu ba arkuivu Muzeum Rezisténsia Timorense (AMRT) atu servisu ho sériu hodi identifika abrigu istóriku sira hodi prezerva sai fatin turizmu," Deputadu Farria dehan.

Nia dehan, haree mós sitíu istóriku sira tanba dalabarak mak monta sinál iha fatin istóriku sira hanesan, Mahunu iha Same, Vicente Reis iha Alas, harii tiha monument, maibé laiha sustentabilidade, hodi hamoris sitiu sira atu jerasaun foun bele hatene istóriku ho di'ak.

Nia dehan, presiza tau atensaun ba abrigu funu nian sira ne'e atu bele hatene di'ak valór istoria nian, tanba istoria presiza konta ho loloos no tenke prezerva.

Entretantu Prezidénsia Konsellu Ministru Konsellu Agio Pereira hatete, parte Arkuivu Muzeum Rezisténsia Timorense (AMRT) simu hodi reforsa servisu AMRT nian hodi halo prezerva istoria Timor-Leste nian.

"Atu prezerva abrigu istóriku sira-ne'e AMRT halo hela peskiza ida no tinan oin sei kontinua peskiza hodi idenfika abrigu sira," nia dehan iha Parlamentu Nasionál, Díli.

Nia dehan, komesa governu anteriór to'o governu atuál, identifika ona abrigu hamutuk 14 kompostu husi Munisípiu Ermera, Manufahi, Baucau, Bobonaro, no sei kontinua halo prosesu prezervasaun.