Quarta, Fevereiro 19, 2025

Komunidade aldeia rua iha suku Motael hanesan, aldeia Halibur no Liru durante ne’e okupa uma no rai estadu ne'ebé husik hela husi tempu okupasaun Portugés no Indonézia nian.

Komunidade aldeia rua iha suku Motael hanesan, aldeia Halibur no Liru durante ne’e okupa uma no rai estadu ne'ebé husik hela husi tempu okupasaun Portugés no Indonézia nian.

Xefe Suku Motael Luis António Gusmão Viegas dehan, uma no rai ne'ebé husik hela husi tempu Portugés no Indonézia ne'e konsidera katak estadu mak sai nain ona, no komunidade sira ne’ebé mak okupa bainhira estadu haruka sai tenke sai.

"Ita-nia komunidade iha suku Motael iha aldeia rua hanesan Halibur no Liru ne'e kuaze okupa uma no rai estadu nian ne'ebé mak husik hela husi tempu okupasaun Portugés no Indonézia nian," nia hatete.

Nia dehan, komunidade aldeia rua ne'e kuaze xefe família hamutuk atus-tolu (300) inkliu orgaun titulár balun mak okupa rai no uma estadu hirak ne'e.

"Tuir loloos uma sira husi okupasaun Portugés nian mai to'o Indonézia ne'e estadu nian ona, maibé ita-nia komunidade sira okupa tiha," nia dehan.

Nia dehan, bainhira estadu haruka sai sira tenke sai no husik hela fatin refere no buka fatin seluk hodi hela.

Alende ne'e nia dehan, autoridade lokal iha ona planu atu halo enkontru ho komunidade sira kona-ba espasu sira ne'ebé tama iha mapamentu eviksaun nian hodi fó hanoin hela ba komunidade sira.

Entretantu okupante Matilde Sarmento dehan, ko'alia kona-ba dezenvolvimentu povu hotu apoiu no kontribui.

"Ami husu antes atu mai halo eviksaun tenke halo mediasaun no fó prazu ba ami atu nune'e ami bele buka fatin ruma," nia dehan.

Nia husu governu tenke prepara kondisaun ba sira atu nune'e bainhira hasai sira husi fatin refere bele lori sira ba iha fatin ne'ebé dignu.