Viola Oras Soe Fo’er Nian, MAE Sei Fo Sansaun Multa

Ministerio Administrasaun Estatal, sei fo sansaun multa ba kompania ne’ebe viola orariu soe fo’er nian ne’ebe governu determina tiha ona.

Ministerio Administrasaun Estatal (MAE), Jorge da Conceicao Teme, hateten oras ne’e dadaun elabora hela diploma ministerial ida atu haforsa dekretu lei numeru 33/2009, hodi fo sansaun ba iha kompania no individu sira ne’ebe viola orario.

“Agora prepara hela despaixu diploma ministerial ida atu bele haforsa tan implementasaun multas ba sira ne’ebe secara sengaja no tidak sengaja soe foer iha estrada ibun no fatin ne’ebe deit,” Ministru Teme hateten, iha Sentru Konvensaun, Dili. 

Ministru Teme, hatutan baze legal iha ona, maibe durante ne’e seidauk implementa ho masimu liu –liu sansaun sira ne’ebe hakerek iha lei ne’e, tanba seidauk iha depaixu ida entre ministerios atu koordena servisu ne’e. 

Nia hatutan, tinan oin sei hahu implementa, tanba ne’e sei la tolera kompania no individu sira ne’ebe soe fo’er arbiru iha dalan protokolu sira.

Entretantu Administrador Distritu Dili, Gaspar Soares, hateten diploma ministerial ne’e importante tebes atu bele regula atividade hotu ne’ebe iha sidade laran, inklui mos regula semiterio Becusse ne’ebe foin lalais loke. 

“Buat hotu regula ona iha diploma ministerial ne’ebe sei implementa,” nia dehan.