- Publika iha: 17 Janeiro 2015
Tinan 23 ona masakre Santa Cruz akontese no joventude asu wa’in lubuk ida mate tanba hetan tiru husi militar Indonezia, no to’o agora barak mak seidauk hetan sira nia ruin nia paradeiru.
Prezidente Komite 12 Novembru, Gregorio Saldanha, hateten atu identifika restu mortais sira ne’e la’os fasil tanba presiza halo konsultasaun hodi indentifika fatin sira ne’ebe deskonfia hakoi vitima sira ne’e.
“Ami identifika ona balun, maibe barak mak seidauk,” Prezidente Komite 12 Novembru, Saldanha hateten, iha Santa Cruz, Dili.
“Ami sei la tuur nonok, nafatin buka tuir, maibe ami tenke hatene fatin, ke’e no halo teste DNA depois entrega ba familia hodi haloot, ”.
Nia hatutan, durante ne’e konsege rekolha ona restu mortais husi 12 Novembru nian hamutuk nain 14 ne’ebe entrega ona ba iha familia hodi haloot.
Alem de ne’e, nia rekolha restu mortais 12 Novembru nian komite mos rekolha restu mortais sira ne’ebe mate antes akontesementu 12 de Novembru 1991 hamutuk nain 10 ne’ebe entrega ona ba familia.
Iha fatin hanesan, sobrevivente 12 Novembru, Eugebio Araujo, hateten nudar sobrevivente sira sei hamutuk ho estadu hodi buka tuir vitimas sira ne’ebe to’o agora seidauk hetan sira nia ruin.
“Ami sei hamutuk ho governu hodi buka tuir restu mortais sira ne’e atu intrega ba familia haloot sira ho dignu, tanba sira mate ba rai ida ne’e, la’os mate tan naok ten,” nia hateten.
Tanba ne’e nia mos husu ba ema sira ne’ebe uluk haree hetan fatin ne’ebe militar Indonezia oho vitima sira, atu fo hatene ba komite, nune’e bele buka tuir restu mortais sira.
Entretantu reprejentante familia restu mortais nudar mos sobrevivente, Terezinha Jose de Araujo, fo konfiansa tomak ba estado atu buka tuir heroi sira ne’e nia restu mortais.
“Barak mak seidauk hetan no laiha informasaun, familia sira hein to’o agora,” nia hateten.