- Publika iha: 14 Setembro 2016
Sekretaria Jeral Federasaun Atletismu, Filomena Reis konsidera governu halo diskriminasaun ba iha desportu modalidade individuals, liu –liu asistensia ne’ebe durante ne’e governu fo laiha balansu.
Timor iha ona modalidade desportu oi-oin ne’ebe eziste, maibe nia dehan modalidade balun liu –liu individu sira lamosu iha publiku, tanba la hetan apoiu maximu husi governu no entidade hotu.
Nia dehan, dezenvolvementu desportu la’os deit modalidade football maibe modalidade seluk mos (boxing, marathona, tae kwondo, kempo inklui mos hiit besi ga weight lifting), presiza iha politika asistensia ida igual ba modalidade hotu.
“Modalidade individu sira ne’e interesante tebes, maibe ema ladun fo atensaun,” nia hateten iha Gedung Matahari Terbit, Dili.
Tuir nia, kampiaunatu lolos iha desportu mak atleta individu sira, tanba sira luta mesa-mesak iha kampu.
Nia hatutan, federasaun modalidade individuals infrenta difikuldade oi-oin, liu-liu hasa’e kapasidade no dezenvolve sira nia abilidade tanba laiha espasu proprio atu halo treinu.
Nia mos, lamenta ho servisu jornalistas nian tanba durante ne’e jornalista sira fo sai informasaun kona ba football deit, maibe kompetisaun modalidade individu sira nunka fo sai ba publiku.
Entretantu Prezidente Komisaun F (saude, edukasaun, kultura, veteranus, igualidade jeneru no desportu), Deputadu Virgilio da Costa Hornai hateten governu esforsu maka’as atu dezenvolve area desportu, maibe presiza tempu.
“Tenke haree kapasidade finanseiru atu halo akompanhamentu,”nia hateten.
Nia rekonese, subsidio ne’ebe governu fo ba federasaun sira la sufsente maibe ida ne’e mak governu nia forsa finanseirus.