- Publika iha: 30 Setembro 2016
Diretor Jeral iha Diresaun Nasional Terras Propriedade (DNTP), Romao Guterres hateten komunidades ne’ebe durante ne’e hela iha rai estadu, nain 2000 mak hahu selu ona arendamentu ba estadu.
Tuir nia, kuaze komunidade ne’ebe mak hela iha capital Dili, barak mak agora dadaun okupa rai estadu, no kada fulan tenke selu arendamentu ba estadu liu husi DNTP.
“Sira hela rai estadu, maibe sira selu arendamentu ba estadu,” Diretor Jeral Guterres hateten, iha Dili.
Tuir dadus ne’ebe iha, katak hahu tinan 2000 to’o 2014, nia hateten DNTP konsege hatama ona reseitas arendamentu ba kofre estadu hamutuk $ 26,884,669, iha tinan 2015 $3,750,403, enkuantu iha 2016 (Janeiru-Julhu) konsege rekolha ona $2,68.000.
Nia dehan, ema barak mak seidauk selu arendamentu ba estadu maske sira okupa hela rai estadu nian e DNTP kontinua halo avaliasaun iha terenu.
“Ami rekruta ona ema foun nain 12 , ajuda hodi halo lavantamentu iha Dili laran, hahu uluk iha perumahan ne’ebe indonesia sira husik hela; hanesan iha Surikmas, Osindo, Delta no PerumNas,” nia hateten.
Nia hateten, maioria rai estadu governu fo ba kompanha sira hodi loke bisnis, balun halo sai rezidensia embaixador sira, e ne’e hanesan politika governu nian halo investimentu hodi aumenta reseitas domestika.
Komunidade ne’ebe hela iha rai estadu no kada fulan sira selu ba estadu, maibe nia dehan iha kualker tempu governu bele foti bainhira atu halo konstrusaun ruma ba interese komun nian.
Governu iha dever atu rekolha arendamentu hirak ne’e, tanba tuir nia iha lei numeru I/2003 no dekretu lei 18/2004 hatuur klarumente kona ba afeitasaun official no selu arendamentu.
Iha fatin seluk Membru Parlamentu Josefa Alvares Soares, apresia ho servisu DNTP ne’ebe konsege hatama ona reseitas ba estadu hodi kontribui ba rendementu domestika.
“Ida ne’e esforsu ne’ebe diak, tanba ita presiza tau hamutuk ona ita nia reseitas rai laran,” nia hateten.
Nia mos kontente, tanba komunidade bele kolabora diak ho governu hodi kontribui ba dezenvolvementu rai laran.