Ezekusaun OJE Iha MD Atinji Ona 67%

Ministru Defeza (MD) Cirilio Cristovao, hateten ezekusaun Orsamentu Jeral do Estadu (OJE) iha Ministeriu Defeza iha metade tinan ne’e (2016) atinji ona 67%.

Nia hateten, husi OJE 2016 nian iha ministeriu ne’e hamutuk $26,217,240.00 barak liu ezekuta ba atividades ministeriu nian, halo tratamentu mediku ba veteranus aktivu sira inklui manutensaun ba roo.

“Ami aloka balun mos ba formasaun membru forsa sira iha rai liur, no manutensaun roo tanba governu konsidera ne’e importante liu,” Ministru Cristovao hateten.

Nia informa, governu konsege halo ona manutensaun ba roo hat e roo rua konklui ona, rua seluk sei prosesu hela.

“Sei atraza, tanba tenke hein kompania husi Korea mak mai hadia, tanba roo rua ne’e husi ne’eba,” nia informa.

Enkuantu orsamentu ne’ebe ezekuta ba manutensaun roo hat ne’e hamutuk $600 mil resin.

Iha parte seluk Membru Parlamentu (MP) Arao Noe Amaral, rekonese katak ezekusaun orsamentu iha MD la’o hela no hatudu duni progressu.

“Sira uza duni osan sira ne’e tuir planu ne’ebe sira trasa ona,” MP Amaral hateten.

Maibe, nia dehan governu tenke jere osan ne’e ho diak, hodi hadutu ba publiku katak governu iha duni kapasidade.

Tanba, nia dehan iha MD barak liu aloka ba administrasaun hanesan selu salariu, enkuantu ba projetu fiziku ne’e ladun iha.