- Publika iha: 01 Dezembro 2016
Parlamentu Nasional (PN) aprova final global ba lei kriasaun regimentu kontributivu seguransa social nian ba trabalhadores sira iha rai laran.
Kontiudu lei ne’e atu obrigadu instituisaun ou orgaun governu inklui kompanha privadu sira tenke halo akordu ho trabalhadores hodi koa sinku ou seis pursentu (5-6%) husi sira nia salariu ba seguransa social.
Iha aprovasaun final global ba lei ne’e rasik pasa ho unanimidade ho votus afavor 47, kontra 0, abstensaun 0 husi total deputadus nain 47.
Membru Parlamentu (MP) Fernanda Lay, hateten sira vota afavor ba lei ne’e, tanba importante no bele garantia sustentabilidade ba uzus fundu petrolifero.
“Labele depende osan husi mina rai deit, sira kontribui nune’e wainhira iha asidente ruma, sira bele uza osan ne’e,” MP Lay hateten.
Iha mos vantagen seluk husi lei ne’e mak , nia dehan lei ne’e bele garantia mos kada trabalhador ga funsionariu sira wainhira reforma. “Sira bele utiliza osan sira ne’e,” nia dehan.
Enkuantu tuir MP Jose Luis Guterres, katak lei ne’e atu proteje direitus trabalhodores nian hodi asesu ba seguransa saude ne’ebe diak wainhira hetan moras ruma.
Tanba tuir nia, durante ne’e trabaldores sira seidauk hetan tratamentu ne’ebe diak husi kompanha nain sira, liu-liu wainhira moras ou hetan asidente ruma.
“Entaun ami aprova lei ne’e hodi sira bele hetan sira nia direitu ida ne’e,” nia hateten.
Nia mos hatutan, katak iha tinan oin (2017) governu tenke hasa’e mos osan ba salariu minimu hodi nune’e bele koa osan balun ba kontributivu seguransa nian.
Iha parte seluk trabalhador Jacinto Gusmao, apresia ho inisiativa ida ne’e e husu mos ba governu atu sosializa lei ne’e ba kompanha nain sira molok tama ba vigor.
“Ne’e diak, atu ajuda ami, maibe presiza halo sosializasaun,” nia sujere.