Quinta, Novembro 26, 2020
Total visitors: 537104

Ministru Kordenador Asuntu Ekonomia (MKAE), Joaquim Amaral hateten governu deside ona atu asume responsabilidade hodi fahe ai-han ba individu iha familia laran ho valor $25 fulan ida, liu husi medida Cesta Basica.

Ministru Kordenador Asuntu Ekonomia (MKAE), Joaquim Amaral hateten governu deside ona atu asume responsabilidade hodi fahe ai-han ba individu iha familia laran ho valor $25 fulan ida, liu husi medida Cesta Basica.

Nia dehan, orsamentu fundu COVID-19, fahe ba kategoria rua mak bens servisu aloka $71 milhoens, husi $113 milhoens ne’ebe alokadu hodi halo intervensaun primeira medida bolu sesta bazika atu fahe aihan ba ema ida-ida ho valor $25 iha fulan ida no transferensia publika aloka $42 milhoens husi $45.5 milhoens hodi apoia empreza no trabalhador setor informal sira.

“Governu deside ona atu asume responsabilidade fahe sasan ba ema ida-ida iha familia ho objetivu atu ajuda produtor sira no motiva sira bele produs tanba iha komprador ne’ebe bele sosa,” nia hateten iha plenaria parlamentu nasional.

Nia dehan kompra ne’e sei halao iha merkadu lokal sira, alende osan sirkula iha rai laran bele motiva mos familia sira hare potensialidade bo’ot setor agrikultura nian hanesan solusaun ba situasaun sira ne’ebe difisil tanba ne’e governu deside fahe ai-han duke osan.

Entretantu, Presidente Komisaun D asuntu ekonomia no dezenvolvimentu, Deputado Antonino Bianco hateten rekuperasaun ekonomia iha komponente hat iha primeira faze ne’e ida mak sesta bazika ne’e liga ba familia no produtor lokal sira.

“Osan ne’e atu bele sosa produtu lokal ne’ebe produtor sira produs. Signifika dezenvolvimentu integradu osan sirkula iha ita nia rai no bele motiva grupo agrikultor sira halao atividade ekonomia produtivu. Nune’e ema barak sei produs no ita nia depedensia produtu rai liur sei menus,” nia hateten.

Nia espera politika ida ne’e bele atinji duni objetivu ne’ebe iha, liu-liu hasa’e produsaun iha rai laran no fazeamente depedensia produtu rai liur bele redus.

Iha parte seluk, komunidade Antonio soares apoia governu osan ne’ebe iha sosa aihan produtu lokal fahe ba familia sira hodi bele trava osan sira ne’e sirkula deit iha rai laran.

“Hau hanoin desizaun ida ne’e diak, maibe ita mos tenke hare fali ba ita nia produsaun iha rai laran sufisiente ou lae tanba realidade produsaun foos la sufisiente,” nia hateten.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04