Domingo, Janeiro 24, 2021
Total visitors: 544370

Parlamentu Nasional autoriza Presidente Republika (PR) Francisco Guterres Lú Olo dekreta Estado Emergensia (EE) dala walu ho votus afavor 46 atu fo biban ba governu hodi asegura saúde publika no halo prevensaun maximu ba propagasaun surtu COVID-19.

Parlamentu Nasional autoriza Presidente Republika (PR) Francisco Guterres Lú Olo dekreta Estado Emergensia (EE) dala walu ho votus afavor 46.

Presidente Parlamentu Nasional, Deputado Aniceto Lounguinhos Guterres Lopes hateten informasaun sira iha projeitu lei no 14/IV/3 kona ba renovasaun estado emergensia dala walu ne’e laiha diferensia ho EE sira liu ba.

“Parlamentu hein governu implementa ho didiak hodi garantia nafatin saúde publika no halo prevensaun maximu ba transmisaun COVID-19 iha ita nia rai,” nia hateten iha plenaria Parlamentu Nasional, Dili.

Nia dehan estado emergensia dala hitu termina iha oras 23: 59 loron 3 Dezembru tinan 2020 tanba ne’e Presidente Republika dekreta dala ida taan EE ba loron 30. Nia hateten deklarasaun estado emerjensia sei abranje ba teritorio nasional tomak.

Entretantu, Deputada Carmelita Caetano Moniz konkorda estado tenke foti medida adekuadu hodi responde ba surtu COVID-19, ne’ebe sai ameasa ba saúde publika iha mundu, maibe medida ne’e la sempre tenke liu husi deklarasaun estado emergensia tanba kazu iha Timor-Leste importado.

Nia dehan fulan kotuk Presidente Republika promulga ona lei portesaun sivil ne’ebe governu bele uza hodi responde ba surtu COVID-19 tanba iha lei ne’e hateten bele deklara estado iha situasaun alerta no kalamidade.

“Hau husu se bele karik fulan oin governu lalika mai ona husu autorizasaun husi parlamentu nasional, maibe ita bo’to sira bele implementa deit lei protesaun sivil liu husi rezulusaun husi konselho ministru nian ho nune’e ita bele habadak dalan hasoru pandemia COVID-19,” nia hateten.

Nia mos sente preokupa no duvida ho situasaun iha rai laran tanba kada fulan bainhira governu husu atu halo renovasaun ba Estado Emergensia sempre husi saúde anunsia kazu positivu foun.

Iha parte seluk Ministra da Saúde, Doutora Odete Maria Freitas Belo hateten sira halo ona karta ba Organizasaun Mundial Saúde katak Timor-Leste hakarak asesu ba vasina COVID-19.

“Ami halo ona karta ba OMS katak Timor prontu no hakarak simu vasina tanba ne’e loron 7 Novembru ami sei haruka fali karta ba hodi hetan vasina, maibe ita seidauk halo desizaun kona ba modelu tanba ita hakarak halo kampanha ou ita sai ba liur mak simu vasina. Ami sei aprezenta iha konselho ministru hodi hetan desizaun,” nia hateten.

Nia dehan sira kontinua halo sensibilizasaun prevensaun ba komunidade sira no ba eskola sira atu ema hotu bele kontribui hodi mantein disiplina pratika meius prevensaun COVID-19 hanesan uza maskara, halo distansia sosial no fase liman beibeik.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04