Sábado, Junho 19, 2021

Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS), Dr. Rui Maria de Araújo anunsia ba publiku katak iha loron 17 fulan Marsu, regista tan kazu positivu Covid-19 nain 8, ne’ebe nain 6 iha munisipio Dili, nain 1 iha munisipio Baucau, no nain 1 iha Rejiaun Adminsitrativu Espesial Oecusse-Ambeno (RAEOA).

Kordenador Forsa-Tarefa ba Prevensaun no Mitigasaun Surtu Covid-19 iha Timor-Leste (CIGC-SS), Dr. Rui Maria de Araújo anunsia ba publiku katak iha loron 17 fulan Marsu, regista tan kazu positivu Covid-19 nain 8.

Nia salienta kazu foun 6 iha munisipio Dili ne’e, nain 3 deteta iha aldeia 05 suku Fatuhada, no pasiente sira ne’e iha kontaktu-besik ho kazu positivu ne’ebe anunsia ona hodiseik, no kazu ida husi aldeia São Miguel suku Comoro, pasiente ne’e hanesan professional saúde ne’ebe halao servisu iha unidade hemodealisa iha Hospital Nasional Guido Valdares (HGNV), pasiente ne’e iha kontaktu besik ho kazu ida aldeia 05 suku Fatuhada, no servisu hamutuk ho kazu positivu ida ne’ebe anunsia hodiseik, no kazu rua seluk husi aldeia Avansa Suku Bairo Pite, pasiente ne’e kontaktu besik ho kazu positivu iha cluster hanesan.

Alende ne’e, kazu positivu ida husi Munisipio Baucau, pasiente ne’e hela iha aldeia Moris Foun suku Comoro, ne’ebe halao estudu iha Universidade Nasional Timor Lorosa’e (UNTL). Pasiente ne’e sai husi Dili iha loron 8 fulan Marsu ba Baucau. No kazu ida seluk iha RAEOA ema estranjeiru ne’ebe tama ho vistu servisu.

“Apela ba populasaun Timor-Leste tomak, liu-liu Munisipio Dili, Baucau no Viqueque atu nafatin hakmatek, maske kazu konfirmadu aumenta ba beibeik, no naklekar mos ona ba munisipio Baucau no Viqueque. Husu atu tur nafatin hakmatek, matan moris neon nain, lalika se tilun ba lia anin ka rumores, maibe pratika nafatin medida sira ne’ebe ita hotu hatene ona haensan uza maskara, fase liman beibeik ho sabaun ka dezifentante ruma, evita kose liman ba matan, inus hoi bun, wainhira kumprementa malu la presiza kaer liman, bensa liman, rein malu, hakuak malu, evita halibur malu barak, hamriik ou tur dook husi ema seluk metru ida ho balun,” nia apela liu husi konferensia imprensa iha Sala Situasaun Centru Convensaun Dili.

Nia dehan total kazu ne’ebe rejistu iha munisipio Dili hamutuk 83, ne’ebe namkari iha suku 7, kuarentina ida no instituisaun 3, eventu ida iha postu adminsitrativu Dom Aleixo, Vera Cruz. No total kazu iha munisipio Baucau hamutuk 7 nakmarik iha cluster rua iha Kaibada no Walili, kazu positivu iha RAEOA hamutuk nain 5, munisipio Viqueque kazu 2 no munisipio Covalima.

Nia haktuir servisu saúde Baucau apoia ona munisipio Viqueque atu estabelese laboratoriu hodi halo teste ba amostra sira ne’ebe rekoilha husi atividade buak tuir kontaktu besik, rastreiu aleatoriu ba kazu positivu rua ne’ebe deteta loron hira liu ba.

Iha parte seluk, Xefe Aldeia 05 suku Fatuhada, postu administrative Dom Aleixo Munisipio Dili, Ezidio Freitas Ximenes husu autoridade servisu prevensaun no mitigasaun surtu Covid-19, atu kopera ho autoridade lokal sira hodi identifika fatin risku atu bele halo teste swab tanba regras serka sanitaria bandu halibur malu.

“Hau hanoin sira identifika kazu iha ne’ebe informa ami autoridade atu ami akompania ho seguransa sira bele ba halo teste swab tanba regras bandu ita atu halibur malu, no halibur malu ne’e mos bele hadaet fali moras,” nia hateten.

Nia dehan sira mos lahatene tuir total kazu sira ne’ebe rejistu iha aldeia laran tanba ekipa saúde sira tun mai foti pasiente sira ne’e dala ruma la kordena ho autoridade lokal sira.

Nia rekomenda ba ekipa prevensaun no mitigasaun Covid-19, atu halao servisu iha komunidade tantu halo teste swab, evakua suspeitu no pasiente konfirmadu sira tenke kordena ho autoridade lokal sira atu evita problema seluk.

E-mail Subscription

Enter your email address:

Follow us on Twitter

  • House Banner Side Bar 02
  • House Add Side Banner 04