- Publika iha: 19 Março 2021
Governu liu husi Centru Longistika Nasional (CLN) prepara ona foos 12.000 toneladas hodi antisipa iha situasaun lockdown ba prevensaun surtu corona virus espalha iha Timor-Leste.
Prezidente CLN, Augusto Junior Trindade hateten, atu asegura hamlaha iha situasaun lockdown, dadaun ne’e iha armazem nasional prepara hela foos 12.000 toneladas hodi responde ba situasaun refere.
“Ba munisipiu hotu ami prepara foos tonelada 12.000 hodi asegura komunidade sira labele hamlaha,” Prezidente CLN Junior informa via telefone.
Alende ne’e nia dehan, ba Rejiaun Admistrativa Espesial Oe-cusse Ambeno (RAEOA) CLN prepara ketak 3.000 toneladas ba komunidade sira iha area refere.
“RAEOA sira foti uluk ona tonelada 2.000, falta 1.000 toleladas mak ita asegura hela iha armazem,” nia dehan.
Nia dehan, dadaun ne’e CLN tenke prepara duni fo’os tanba komunidade sira labele halo movimentu tanba iha munisipiu balun implementa serka sanitaria hanesan Viqueque, Baucau no Dili.
“Dadaun ne’e ita iha stock foos hamutuk 23.000 resin ne’ebe antes ne’e importa husi Vietname tonelada 30.000,” nia salienta.
Iha parte seluk, Deputado Alexandrino Cardoso hateten, situasaun ida agora ne’ebe mak implementa serka sanitaria iha munisipiu balun no bandu total komunidade sira halo movimentu ne’e, govenu mos tenke iha politika hodi garante nesesidade ba povu nian liu-liu foos.
“Ita hare situasaun ida agora ne’e limita tiha akividade no movimentu balun komunidade sira iha munsipiu sira iha osan maibe atu sosa foos iha ne’ebe tanba buat hotu tenke mai iha merkado nasional ka Dili tanba me’e governu tenke tau atensaun,” Deputadu Cardoso hateten.
Maibe nia dehan, agora ne’e governu liu husi ministeriu Turismu Comersiu no Industria liu-liu CLN iha ona politika adekuadu hodi apoio foos kada munisipiu iha situasaun serka sanitaria ida ne’e.
“Ita nafatin husu iha distribuisaun foos ne’e ita hakarak komunidade hotu tenke hetan tanba dadaun ne’e sira presija tebes foos,” nia informa iha Parlamento Nasional.