Serka Sanitaria Sesta Bazika Tenke Truka ho Osan

Deputadu iha Parlamentu Nasional husu governu iha situasaun serka sanitaria ne’e programa sesta bazika tenke truka ho osan hodi fo ba povu.

Deputadu Mariano Asnami Sabino hateten, iha implementasaun serka sanitaria ne’e dalan diak liu mak goveru fo osan direta ba povu, tanba dala ruma fo sasan molok to’o komunidade nia liman balun monu iha dalan.

“Ita sujere governu tenke troka sesta bazika ho osan hodi fob a komunidade iha implementasaun serka sanitaria,” Deputado Asanami dehan.

Nia dehan, sasan sesta bazika ne’ebe governu apoio, dala ruma komunidade balun ladun kontente ho sasan sira ne’e.

“Diak liu fo osan diretamente ba komunidade nune’e sira bele sosa rasik sasan tuir sira nia hakarak duke fo sesta bazika,” nia dehan.

Tanba ne’e governu tenke kria fila fali politika, oinsa atu bele fo subsidiu osan direta ba povu tanba situasaun ida agora ne’e sira presija osan no ba sira ne’e simu ona la buat ida, sira ne’ebe seidauk simu tenke truka ho osan.

Entretantu, Ministeriu Asuntu Ekomomiku (MKAE) Joaquin Amaral hateten, konaba apoio sesta bazika ne’e bazeia ba dekret lei numeru 48/2020 Outubru hodi apoio familia no rekopera ekonomia iha rai laran.

“Iha lei ne’e governu apoio familia sira liu husi sasan sesta bazika ne’ebe mak bazeia ba dekretu lei ne’e haruka no ita garante katak distribuisaun ne’e sei la iha manobra iha laran,” Ministru MAKE Amaral hateten.

Maibe nia dehan, konaba rekomendasaun ne’ebe mak deputadu iha uma fukun parlamentu nasional sira hato’o konaba muda sistema sesta bazika ne’e governu konsidera.

“Rekomendasaun sira ne’e hotu ita konsidera tanba ita hotu hakarak ita nia komunidade sira labele hamlahak no iha situasaun serka sanitaria ne’e,” nia hateten.

Nia dehan, atu halo mudansa ba sesta bazika troka ho osan ne’e la’os fasil tanba implementasaun ne’e servisu entre linha ministeriu tanba ne’ebe presija koalia hamutuk fali hodi hare ba politika ne’e, nune’e mos aprezenta ba konseilu ministru hodi foti desizaun.

Alende ne’e, nia dehan, sesta bazika ne’e maioria munisipiu simu ona, dadaun ne’e tama ba Dili, Baucau no Viqueque maibe provizoria sei hapara hela distribuisaun tanba implementasaun serka sanitaria.