- Publika iha: 05 Maio 2021
Polisia Nasional Timor-Leste (PNTL), autoriza deit merkdu rua, Merkadu Taibesi no Merkadu Manleuana, mak funsiona iha kapital Dili laran durante implementasaun konfinamentu domisiariu jeral iha munisipiu Dili.
Komandante Jeral PNTL, Komisariu Faustinho da Costa, hateten implementasaun konfinamentu domisiariu ne’ebe implementa hodi evita no salva populasaun husi virus corona, no iha implementasaun rezolusaun governu nian, bandu funsionamentu aktividade merkadu hotu no autoriza deit merkadu rua mak funsiona hodi fasilita komunidade sira bele asesu atu sosas sassan nesesidade lorloron nian.
“Husi rezolusaun governu ne’e, autoriza deit merkadu ne’ebe mak funsiona mak hanesan, merkadu Taibesi no Manleuana mak loke, mekadu ne’ebe mak la temi ne’e la autoriza,” Komisariu Costa hateten.
Nia dehan, merkadu nasional rua ne’e loke hahu husi oras tuku neen dadersan to’o tuku neen lokraik kada loron, no nafatin mantein protukolu husi ministeriu saude.
“Mekadu sira ne’ebe mak la sita iha rezolusaun ne’e mak halo sira nia aktividade durante implementasaun konfinamentu domisiariu jeral iha Dili laran ne’e polisia sei foti medidas hodi kriminaliza,” nia hateten.
Nia dehan, polisia mos kopera ona ho jestaun merkadu munisipiu Dili hodi kontrola no hapara aktividade merkadu sira ne’ebe mak la temi katak la premite sira nia aktividade.
Alende ne’e nia dehan, konaba kios no loja sira polisia la bandu sira nia aktividade, maibe tenke kumpri regras fase liman, mantein distansiamentu social, no uza maskara no tenke desinfekta kada loron.
Iha parte seluk, Xefe Departamentu Jestaun Merkadu Munisipiu Dili, Berta Santa Viera Gonsalves hateten, hahu seguna loron 3 maiu lokraik ekipa jestaun merkadu hamutuk ho polisia hapara ona atividade merkadu balun ne’ebe mak negosiante sira halo iha merkadu ne’ebe mak la mensiona iha rezolusaun governu nian konaba implementasaun konfinamentu domisiariu jeral refere.
“Mekadu ne’ebe ita konsegue hapara ona mak iha area Pantai Kelapa, Rotunda Kampung Baru, no Bairu-Pite nian inkliu iha Elemloi,” Xefe departamentu Viera hateten via telefone.
Nia dehan, ekipa jestaun merkadu no polisia nafatin esforsu hodi kontrola fatin sira ne’ebe mak negosiante sira utiliza hodi faan sira nia produtu no haruka sira ba faan iha merkadu bot Taibessi no Manleuana ne’ebe mak autoriza loke.